ગેહલોત ચોથી વખત ગવર્નરને મળ્યા
(સંપૂર્ણ સમાચાર સેવા)
જયપુર, તા. ૨૯
રાજકીય ખેંચતાણની વચ્ચે રાજ્યપાલ કલરાજ મિશ્રએ વિધાનસભાનું સત્ર ૩૧ જુલાઈથી બોલાવવાની ત્રીજી અરજીને નકારી કાઢી છે. તે પછી મુખ્યમંત્રી અશોક ગેહલોત ચોથી વખત રાજ્યપાલને મળવા પહોંચ્યા હતા. ગવર્નરે શરત મૂકી હતી કે સત્ર બોલાવવા માટે ૨૧ દિવસની નોટિસ આપવી જોઈએ. રાજ્યપાલની મુલાકાત પહેલા વિધાનસભા સત્ર બોલાવવા માટે ગવર્નરનો વાંધો દર્શાવતા પત્ર પર ગેહલોતે કહ્યું કે પ્રેમ પત્ર તો પહેલા જ આવી ગયો છે, હવે એમને મળીને પૂછીશું કે તેઓ શું ઈચ્છે ? ૨૧ દિવસની નોટિસની રાજ્યપાલની શરતને લઈને તેમણે કહ્યું કે ૨૧ દિવસ હોય કે પછી ૩૧ દિવસ, જીત આપણી જ થશે. ૭૦ વર્ષમાં પ્રથમ વખત કોઈ ગવર્નરે આ પ્રકારનો સવાલ કર્યો છે. તમે સમજી શકો છો કે રાજ્ય કઈ તરફ જઈ રહ્યું છે ? રાજભવન જતાં પહેલાં ગેહલોતે કહ્યું હતું કે સરકાર પાડવાનું ષડયંત્ર રચાઈ રહ્યું છે પરંતુ અમે મજબૂત છીએ. જેમણે દગો કર્યો છે તેઓ ઈચ્છે તો પાર્ટીમાં પરત આવી શકે છે અને સોનિયા ગાંધીની માંફી માંગી લે. ગેહલોતે ગોવિંદસિંહ ડોટાસરાના કોંગ્રેસ પ્રદેશ અધ્યક્ષનું પદ સંભાળવાના કાર્યક્રમમાં આ નિવેદન આપ્યું છે.

બીએસપી સુપ્રીમો માયાવતીની તપાસની માગણી
ઉત્તરપ્રદેશમાં હજુ પણ જાતિવાદ : મહિલાના શબને અન્ય સ્થળે અંતિમ સંસ્કાર માટે લઇ જવામાં આવ્યો
(સંપૂર્ણ સમાચાર સેવા)
લખનૌ, તા. ૨૮
ઉત્તર પ્રદેશના આગ્રામાં દલિત મહિલાના અંતિમ સંસ્કારને અટકાવવાના મામલે બહુજન સમાજવાદી પાર્ટીના સુપ્રીમો માયાવતીએ ઉચ્ચ સ્તરીય તપાસની માગ કરી છે. માયાવતીએ આક્ષેપ કરતાં જણાવ્યું કે આગરામાં એક ઉચ્ચ જાતિના સ્મશાનમાં દલિત મહિલાના મૃતદેહને મૃત્યુશૈયા પરથી ઉતારીને તેની અંતિમવિધિ અટકાવવાનો પ્રયાસ કરવામાં આવ્યો હતો. બસપા પ્રમુખે ટ્વીટ કરીને જણાવ્યું કે, આગરા નજીક દલિત મહિલાના મૃતદેહને કેટલાક ઉચ્ચ જાતિના લોકોએ મૃત્યુશૈયા પરથી ખસેડી અંતિમક્રિયા અન્ય સ્થળે કરવા જણાવ્યું હતું. આ સ્મશાન ઉચ્ચ જાતિના લોકોનું હોવાનું જણાવી આવું વર્તન કરાયું હતું. આ શરમજનક અને ધિક્કારને પાત્ર ઘટના છે. આવી જાતિવાદને ઉશ્કેરતી ઘટનાની ઉચ્ચ સ્તરે તપાસ થવી જોઈએ તેમ માયાવતીએ જણાવ્યું હતું.
ઉત્તર પ્રદેશ સરકારને ટાંકીને પૂર્વ સીએમ માયાવતીએ જણાવ્યું કે આવા ઘૃણાસ્પદ બનાવ બદલ દોષિતોને કડક સજા કરવી જોઈએ જેથી ફરી આવી ઘટનાઓ ઘટતી રોકી શકાય. માયાવતીએ વધુમાં મધ્ય પ્રદેશના દલિત ડોક્ટર જેમનું દિલ્હીમાં કોરોના વાયરસથી મૃત્યુ થયું તેમના પરિવારજનોને આર્થિક મદદ કરવા પણ માંગ કરી હતી. તેમણે જણાવ્યું કે દિલ્હી સરકારે જાતિવાદી માનસિકતાને છોડીને દિલ્હીમાં સેવારત તબીબના મૃત્યુને પગલે તેના પરિવારને તમામ મદદ કરવી જોઈએ.

સરકાર પર કોંગ્રેસના ચાબખા
(સંપૂર્ણ સમાચાર સેવા)
નવી દિલ્હી, તા. ૨૮
મોદી સરકાર દ્વારા ૪૭ ચાઈનીઝ એપ્સને બેન કરવાના એક દિવસ બાદ કોંગ્રેસના પ્રવક્તા અભિષેક મનુ સિંઘવીએ જણાવ્યું છે કે, મોદી સરકાર પબજી પર પ્રતિબંધ મૂકવા માગતી હતી પરંતુ તેમને ખબર પડી ગઈ કે જો આપણા યુવાનો વીડિયો ગેમ્સ નહીં રમે તો તેઓ બેરોજગારી અંગે પ્રશ્ન પૂછશે. અભિષેક મનુ સિંઘવીએ જણાવ્યું કે, મોદીજી પબજી ગેમને બેન કરવા માગતા હતા પરંતુ પછી તેમને લાગ્યું કે જો આપણા યુવાનો કાલ્પનિક દુનિયામાં નહીં હોય તો પછી તેઓ નોકરીઓ જેવા વાસ્તવિક દુનિયાના મુદ્દાઓ પર વાત કરશે જે તેમના માટે મુશ્કેલી ઉભી કરી શકે છે.
સોમવારે સરકારના માહિતી અને પ્રોદ્યોગિક મંત્રાલયે વધુ ૪૭ ચાઈનીઝ એપ્સ પર પ્રતિબંધ મૂકી દીધો હતો. આ ઉપરાંત એવા એહવાલ પ્રાપ્ત થયા છે કે સરકાર ૫૦ ચાઈનીજ એપ્સને બેન કરવા પર વિચાર કરી રહી છે. આ એપ્સની યાદી બનાવવામાં આવી રહી છે અને તેમાં પબજી સામેલ છે.

કોંગી નેતાને કોણ સલાહ આપે છે તે અંગે ગણગણાટ
વીડિયો રિલિઝ કરતા પહેલા પોતાના સાથી નેતાઓ કે કાર્યકરો સાથે સલાહ લેવા ચર્ચા વિચારણા કરી રહ્યા નથી
(સંપૂર્ણ સમાચાર સેવા)
નવી દિલ્હી, તા. ૨૮
રાહુલ ગાંધી દ્વારા છેલ્લા કેટલાક દિવસોથી રોજ સોશ્યલ મીડિયા પર વિડિયો રિલિઝ કરીને સતત ચીન મુદ્દે મોદી સરકારની ટીકા કરવામાં આવી રહી છે. રાહુલ ગાંધીના ચાહકો તો તેના ભરપૂર વખાણ કરી રહ્યા છે પણ કોંગ્રેસમાં જ એક જૂથ આ પ્રકારના વિડિયોથી નારાજ હોવાની ચર્ચાઓ પણ દબાતા સૂરે ચાલી રહી છે. નેતાઓનું એક જૂથ રાહુલ ગાંધીના આ પ્રકારના એપ્રોચ પર સવાલ ઉઠાવી રહ્યું છે. કારણકે રાહુલ ગાંધી આ પ્રકારના વિડિયો રિલિઝ કરતા પહેલા પોતાના સાથી નેતાઓ કે કાર્યકરો સાથે સલાહ લેવા ચર્ચા વિચારણા પણ કરી રહ્યા નથી. એક ન્યૂઝ ચેનલ સાથેની વાતચીતમાં એક નેતાએ કહ્યુ હતુ કે, રાહુલ અમારી સાથે વાત કરતા નથી અને અમને ખબર નથી કે તેમને કોણ સલાહ આપે છે. આ જ મુદ્દે પી ચિદમ્બરમને પત્રકાર પરિષદમાં પૂછવામાં આવ્યુ ત્યારે ત્ેમણે પણ કહ્યુ હતુ કે, રાહુલ ગાંધીએ મારી સલાહ લીધી નથી.કારણકે હું સંરક્ષણ કે વિદેશ મંત્રી રહ્યો નથી. દરમિયાન કોંગ્રેસમાં એવી પણ ચર્ચા ચાલી રહી છે કે, સોનિયા ગાંધી અને રાહુલ ગાંધીની ટીમો અલગ-અલગ થઈને કામ કરી રહી છે.રાહુલ ગાંધી પોતાના પ્રભાવનો ઉપયોગ જવાબદારીથી કરી રહ્યા નથી .જેનાથી કોંગ્રેસમાં સવાલ ઉઠી રહ્યા છે. ન્યૂઝ ચેનલ સાથેની વાતમાં નેતાને પૂછવામાં આવ્યુ કે, સોનિયા ગાંધી કરતા અલગ રસ્તા પર રાહુલ ગાંધી કેમ જોવા મળે છે ત્યારે આ નેતાએ કહ્યુ હતુ કે, કદાચ રાહુલ ગાંધી વિચારતા હશે કે અમે બધા બેકાર છે અને તેમના જ સલાહકારો બધુ સારી રીતે જાણે છે.

રાજસ્થાનના મુખ્યમંત્રી ગહેલોતનું નિવેદન
(સંપૂર્ણ સમાચાર સેવા)
જયપુર, તા. ૨૭
રાજસ્થાનના ચાલી રહેલા રાજકીય સંકટને લઈને મુખ્યમંત્રી અશોક ગહેલોતે વડાપ્રધાન નરેન્દ્ર મોદી સાથે વાત કરી હતી. ગહેલોતે જણાવ્યું છે કે, તેમણે રાજ્યપાલ કલરાજ મિશ્રા અંગે રવિવારે વડાપ્રધાન મોદી સાથે વાત કરી છે અને રાજ્યપાલના ’વર્તન’ અંગે તેમને અવગત કરાવ્યા હતા. ઉપરાંત ગહેલોતે રાષ્ટ્રપતિ રામનાથ કોવિંદની સાથે પણ વાત કરીને તેમને રાજ્યની સ્થિતિની જાણકારી આપશે. ગહેલોતે જણાવ્યું કે, મેં વડાપ્રધાનની સાથે ગઈ કાલે વાત કરી હતી અને રાજ્યપાલના વર્તન અંગે તેમને જણાવ્યું છે. મેં સાત દિવસ પહેલાના પત્ર પર અંગે પણ વડાપ્રધાન મોદી સાથે વાત કરી છે. ગહેલોતે જણાવ્યું કે, રાજ્યપાલે તેમને છ પાનાંનો ’પ્રેમ પત્ર’ મોકલ્યો હતો. ગયા અઠવાડિયે મુખ્યમંત્રી અશોક ગહેલોતે વડાપ્રધાન મોદીને એક પત્ર લખીને રાજ્યના રાજકીય ઘટનાક્રમથી અવગત કરાવ્યા હતા. ત્યારબાદ અશોક ગહેલોતે જણાવ્યું હતું કે, તેમણે પત્ર એટલા માટે લખ્યો કેમકે તેઓ નથી ઈચ્છતા કે કાલે પછી વડાપ્રધાન કહે કે તેમને આની જાણકારી જ નહતી.

આ પડકાર નથી પણ તેમનો સ્વભાવ છે : મુખ્યમંત્રી
કેટલાક લોકોને પાડવામાં-તોડવામાં ખુશી મળે છે : ઉદ્ધવ
(સંપૂર્ણ સમાચાર સેવા)
નવી દિલ્હી, તા. ૨૬
મધ્ય પ્રદેશમાં કોંગ્રેસ સરકાર પાડવા અને રાજસ્થાનમા સચિન પાયલોટના રાજીનામાથી અસ્થિર રાજકીય હાલતની વચ્ચે મહારાષ્ટ્રના મુખ્ય મંત્રી ઉદ્ધવ ઠાકરેએ પડકાર આપ્યો છે કે, જે કોઈને પણ મહારાષ્ટ્રની સરકાર પાડવી છે તે પાડીને બતાવે. તેમણે જણાવ્યું કે, કેટલાક લોકો કહી રહ્યા છે કે ઓગસ્ટ-સપ્ટેમ્બરમાં સરકાર પાડી દઈશું. હું કહું છું કે અત્યારે જ પાડી દો. હું ફેવિકોલ લગાવીને બેઠો છું. ઠાકરેએ રાજ્યમાં મુખ્ય વિપક્ષી દળ ભાજપ પર નિશાનો તાકતા જણાવ્યું કે, તમને (ભાજપને) પાડવામાં અને તોડવામાં ખુશી મળે છે. કેટલાક લોકોને બનાવવામાં ખુશી મળે છે. મને કંઈ પડી નથી. પાડી દો સરકાર. ઠાકરેને સવાલ કરવામાં આવ્યો કે શું તેઓ પડકાર આપી રહ્યા છે તો તેમણે જણાવ્યું કે આ પડકાર નથી પરંતુ તેમનો સ્વભાવ છે. ઠાકરેએ જણાવ્યું કે, આ સરકારનું ભવિષ્ય વિપક્ષના નેતા પર નિર્ભર નથી તેથી હું જણાવી રહ્યો છો કે જો તમારે પાડવી છે તો પાડી દો. ઉદ્ધવે ત્રણેય દળની તુલના રિક્ષાના ત્રણ પૈડા સાથે કરતા જણાવ્યું કે, રિક્ષા ગરીબોની સવારી છે. બુલેટ ટ્રેન અને રિક્ષાની વચ્ચે એકની પસંદગી કરવી પડશે તો હું રિક્ષાને પસંદ કરીશ. તેમણે વધુમાં જણાવ્યું કે, હું ગરીબોની સાથે ઉભો રહીશ. મારી આ ભૂમિકા હું બદલવા માગતો નથી. કોઈ એવું વિચારે નહીં કે હવે હું મુખ્યમંત્રી બની ગયો છું તો હું બુલેટ ટ્રેનની પાછળ ઉભો રહીશ.