ગુજરાત-રાજસ્થાન બોર્ડર પર પોલીસે પકડી લીધો
બૂટલેગરને પકડ્યા બાદ સ્કૂટરના દરેક ખૂણા અને કોર્નરને દારૂની બોટલથી ભરેલા જોઈને પોલીસ ચોંકી ઉઠી હતી
(સંપૂર્ણ સમાચાર સેવા)
અમદાવાદ,તા.૧૩
ડ્રાય ગુજરાતમાં ૧૦૦ લીટર દારૂની ટુ-વ્હીલર પર હેરફેર કરવાનો વિચાર પણ પરસેવો લાવી દે તેવો છે. ત્યારે એક બુટલેગર ગિયર લેસ સ્કૂટર પર ૭૫૦ એમએલની ૧૨૫ દારૂની બોટલ લઈ જતા પકડાઈ ગયો હતો. સ્કૂટર પર ઓવરલોડેડ દારૂની બોટલો સાથે જતો બૂટલેગર કોઈને પણ સ્પષ્ટ નજરે ચઢે તેવો હતો અને ગુજરાત-રાજસ્થાન બોર્ડર પર પોલીસે તેને પકડી લીધો. બુટલેગરને પકડ્યા બાદ તેના સ્કૂટરના દરેક ખૂણા અને કોર્નરને દારૂની બોટલથી ભરેલા જોઈને પોલીસ પણ ચોંકી ઉઠી હતી. આરોપીએ સ્વીકાર કર્યો કે દારૂની ડિમાન્ડ વધવાના કારણે તેણે સ્કૂટર પર આવે તેટલી બધી બોટલો લઈ લીધી. બનાસકાંઠા જિલ્લાના પંથાવાડા પોલીસ સ્ટેશનમાં રવિવારે નોંધાયેલી ફરિયાદ મુજબ, સાબરમતીનો રહીશ ભરત જાધવ ગુંડી ગામની ચેકપોસ્ટ ક્રોસ કરવા જતા રૂપિયા ૪૬,૦૦૦ની કિંમતની ૧૨૫ દારૂની બોટલો સાથે પકડાયો હતો. તેના વ્હીકલમાં ૯૩ લીટર દારૂ અને બાકી કાચની બોટલનો વજન હતો. સાબરમતીનો જ રહીશ અને ભરતનો અન્ય સાથીદાર ધર્મેશ સિકરવાર પણ રૂપિયા ૨૩,૦૦૦ની કિંમતની ૫૦ દારૂની બોટલ સાથે અન્ય સ્કૂટર પરથી પકડાયો હતો. બનાસકાંઠા પોલીસના સૂત્રોએ જણાવ્યું કે, સિકારવાર પહેલા પકડાયો અને બાદમાં તેનાથી એક કિલોમીટર પાછળ આવતો જાધવ પકડાયો. એફઆઈઆરમાં કહેવાયું છે કે, જાધવે શરૂઆતમાં પોલીસને જણાવ્યું કે, તે દારૂ વિશે કશુ જ જાણતો નથી અને તે માત્ર માલને અમદાવાદ ડિલીવર કરવા જઈ રહ્યો છે. કેસની તપાસ કરી રહેલા પંથાવાડા પોલીસ સ્ટેશનના હેડ કોન્સ્ટેબલ આગજી ચૌધરીએ કહ્યું કે, જાધવે સ્કૂટરમાં પગ મૂકવાની જગ્યાએ મોટો કોથળો ભરીને બોટલો મૂકી હતી. વધુ કેટલીક બોટલો તેના ખભા પાસેના કોથળામાં હતી અને કેટલીક આગળની ડેકીમાં છુપાવેલી હતી. જાધવના પેન્ટમાં પણ ચાર બોટલો હતી. જાધવે બાદમાં પોલીસને જણાવ્યું કે, અમદાવાદમાં કોઈ ગ્રાહક લાંબા સમયથી તેની પાસેથી દારૂની માગણી કરી રહ્યો હતો. આ પહેલા તે ટ્રક કે અન્ય કોઈ મોટા વાહનમાં દારૂની હેરફેર કરતો હતો. પરંતુ પોલીસ સ્કૂટર પર જતા તેને અટકાવશે નહીં તેમ માનીને આ વખતે સ્કૂટર પર દારૂની હેરફેર કરી રહ્યો હતો.

સંઘમાં મોટું પરિવર્તન જોવા મળ્યું
ભાજપ સહકારી આગેવાન નીતિન ઢાકેચા અને ધારાસભ્ય અરવિંદ રૈયાણી વચ્ચે ચેરમેન પદ માટે ભારે ખેંચતાણ
(સંપૂર્ણ સમાચાર સેવા)
રાજકોટ,તા.૧૩
આજે રાજકોટની લોધિકા સંઘની ચૂંટણી યોજાઈ હતી. ત્યારે રાજકોટ લોધિકા સંઘના ચેરમેન અને વાઇસ ચેરમેન પદ પર મોટું પરિવર્તન જોવા મળ્યું. સંઘના ચેરમેન પદ માટે ભાજપના બે જૂથ વચ્ચે લડાઇમાં કોંગ્રેસે મેદાન માર્યુ છે. રાજકોટ લોધિકા સંઘના ચેરમેન પદ પર મૂળ કોંગ્રેસી નરેન્દ્રસિંહ જાડેજાની નિમણૂંક કરાઈ છે. તો વાઈસ ચેરમેન પદ પર સંજય અમરેલીયાની નિમણૂંક કરવામાં આવી છે. સંઘના નવા ચેરમેન બનેલ નરેન્દ્રસિંહ જાડેજા પત્રકાર છે અને અગાઉ રાજકોટ માનપમાં વિપક્ષના નેતા રહી ચૂક્યા છે. ભાજપના ધારાસભ્ય અરવિંદ રૈયાણી અને પૂર્વ ચેરમેન નીતિન ઢાકેચા વચ્ચેના જુથવાદમાં મૂળ કોંગ્રેસી નરેન્દ્રસિંહ જાડેજાની ચેરમેન પદ પર નિમણૂંક થઈ છે. આમ, ભાજપના ડખા વચ્ચે કોંગ્રસ ફાવી ગયું છે. આજરોજ રાજકોટ લોધિકા સંઘની ચૂંટણી યોજાઈ હતી. સંઘના ચેરમેન અને વાઇસ ચેરમેન પદ માટેની ચૂંટણી યોજાઈ હતી. રાજકોટ લોધિકા સંઘમાં ભાજપના જ બે જૂથ આમને સામને હતા. ભાજપ સહકારી આગેવાન નીતિન ઢાકેચા અને ધારાસભ્ય અરવિંદ રૈયાણી વચ્ચે ચેરમેન પદ માટે ભારે ખેંચતાણ ચાલી રહી હતી. આજની ચૂંટણીમાં ધારાસભ્ય અરવિંદ રૈયાણી અને પ્રમુખ નીતિન ઢાંકેચા વચ્ચે બળાબળીના પારખા થવાના હતા. એમએલએ અરવિંદ રૈયાણી પરિવર્તન કરશે તેવો દાવો કરાયો હતો. તો બીજી તરફ, પ્રમુખ નીતિન ઢાંકેચાનો સભ્યોની બહુમતી હોવાનો દાવો હતો. છેલ્લા ૨૧ વર્ષથી નીતિન ઢાંકેચા ચેરમેન પદ પર હતા. ભાજપના આંતરિક જૂથવાદની અસર સહકારી ક્ષેત્રમાં છવાઇ હતી. આ પહેલા રાજકોટમાં લોધિકા સંઘમાં સરકાર તરફી નિમણૂક કરાઇ હતી. જેમાં અરવિંદ રૈયાણી જુથનો દબદબો જોવા મળ્યો હતો. ભાનુ મેતા, ગૌરવસિંહ જાડેજા અને મુકેશ કમાણીની વરણી કરાઈ હતી. તો તેમાં જિલ્લા ભાજપ પ્રમુખ ડીકે સખિયા અને ભરત બોધરાના નામ કપાયા હતા. તેમજ નીતિન ઢાંકેચા જુથે દરખાસ્ત કરેલા બે નામો પણ કપાયા હતા. આમ, સરકારી તરફી નિમણૂંકમા રાજકોટ-લોધિકા સંઘમાં રૈયાણી જુથનો દબદબો જોવા મળ્યો હતો.

ખેલૈયાઓ માટે આનંદના સમાચાર
(સંપૂર્ણ સમાચાર સેવા)
અમદાવાદ,તા.૨
ખેલૈયાઓ, નવરાત્રીનું આયોજન સરકાર દ્વારા પરવાનગી નહી મળવાથી ખુબ જ નીરાશ હતા. કહેવાય છે કે નીરાશમાં પણ આશા હોય છે. એમ ગુજરાતમાં પ્રોફેશનલ ગરબાનું આયોજન શરૂ કરનાર સોઈ ડાંડીયા એક નવતર કોન્ટેસ્ટ લઈને ઉતરીયા છે. ૨૧ વર્ષોમાં ૩૨ ડાંડિયા ઓર્ગેનાઈઝ કરનાર આ કંપનીએ નવરાત્રીના ખેલૈયાઓ માટે ખેલૈયા કી ખોજ – રિયાલિટી શોનું આયોજન કર્યું છે. ખેલૈયા કી ખોજમાં દરેક ઉંમર અને કળાને આવરી લેતી ૧૩ કેટેગરી છે. હવે ડાંડિયા ખેલાડીઓ પોતાની કળા ફક્ત એક પાર્ટી પ્લોટમાં સિમિત નહીં પણ સમગ્ર દેશમાં પ્રદર્શન કરી શકશે. આમાના વિજેતાઓને ગામ કે ફક્ત શહેર નહીં, પણ સમગ્ર દેશમાં અને વિદેશમાં વસતા એનઆરઆઈમાં નામના મેળવી શકશે. બ્યુટી સ્પર્ધામાંથી અનેક યુવાનોએ કારર્કિદી બનાવી, હવે ડાંડિયા ખેલાડીઓને પણ નામના મેળવવાની ઉત્તમ તક છે.
વધુ વિગતો અમારા ફેસબુક પેજ SOI Entertainment પર મેળવી શકશો.

રાજ્યભરમાં ૮૩૫ નંદ ઘરના ઈ- ખાતમુહૂર્ત-લોકાર્પણ
સ્વચ્છતા-સ્વસ્થતા ત્યાં પ્રભુતાનો મહાત્મા ગાંધીનો મંત્ર કોરોના સંક્રમણ સામે અપનાવી મહામારીને હરાવી શકાશે
(સંપૂર્ણ સમાચાર સેવા)
અમદાવાદ, તા. ૨
મુખ્યમંત્રી વિજય રૂપાણીએ ૧૫૧મી ગાંધી જયંતિની રાષ્ટ્રીય સ્વચ્છતા દિવસ તરીકેની રાજ્યવ્યાપી ઉજવણીમાં ૩૮૦૦થી વધુ સ્થળોએ પાંચ લાખ બહેનો – માતાઓના હેન્ડ વોશિંગ કેમ્પેઇનના અભિનવ પ્રયોગનો વિડીયો કોન્ફરન્સથી પ્રારંભ કરાવ્યો હતો. મુખ્યમંત્રીએ કહ્યું કે મહાત્મા ગાંધીજીએ આપેલા સ્વચ્છતા – સ્વસ્થતા ત્યાં પ્રભુતાના મંત્રને કોરોના સંક્રમણના આ કાળમાં અપનાવી હેન્ડ વોશિંગ – હાથ સેનેટાઇઝ કરવા, માસ્કનો ઉપયોગ અને સોશિયલ ડિસ્ટન્સના પાલનથી કોરોના સામેની લડાઇ આપણે જીતવી છે. તેમણે જણાવ્યું કે, મહાત્મા ગાંધી આજીવન સ્વચ્છતાના આગ્રહી રહ્યા એટલું જ નહીં તેમણે આઝાદી અને સ્વચ્છતા બેમાંથી કોઇ એકની પસંદગીમાં સ્વચ્છતાને પહેલી પસંદ ગણાવી હતી. સ્વચ્છતાથી પ્રભુતા અને સ્વચ્છતા ત્યાં જ ઇશ્વરનો વાસ એમ જણાવતાં મુખ્ય મંત્રીએ કહ્યું કે ઈશ્વર એટલે કલ્યાણ અને સ્વચ્છતા થકી જ કલ્યાણ ભાવ સાકાર થાય. આપણા પ્રધાનમંત્રીશ્રીએ આ જ આદર્શો પર ચાલીને સ્વચ્છ ભારત અભિયાન ઉપાડ્યું અને વિશ્વમાં ભારતની છબિ સ્વચ્છ રાષ્ટ્ર તરીકે ઉજાગર કરી છે તેમ પણ મુખ્યમંત્રીએ ઉમેર્યું હતું. મુખ્યમંત્રીએ આ જ સ્વચ્છતાના ભાવની આજના સાંપ્રત સમયમાં આવશ્યકતા સમજાવતા આ હેન્ડ વોશિંગ કેમ્પેઇન રાઈટ જોબ એટ રાઈટ ટાઈમ ગણાવ્યો હતો મુખ્યમંત્રીશ્રીએ ગુજરાતની નારી શક્તિ માતા-બહેનોનું આ અભિનવ અભિયાન કોરોના સામેની લાંબી લડાઈમાં જીત મેળવશે એવો વિશ્વાસ દર્શાવ્યો હતો. તેમણે કહ્યું કે કોરોનાને મ્હાત કરવામાં આ કેમ્પેઈન સૌને નવી પ્રેરણા આપશે. આ હેન્ડ વોશિંગ અભિયાન ગ્રામીણ વિસ્તારો સુધી જનજાગૃતિ લાવનારુ બનશે એમ પણ મુખ્યમંત્રીએ ઉમેર્યું હતું. મુખ્યમંત્રીએ મહિલા અને બાળ વિકાસ વિભાગ આયોજિત આ કાર્યક્રમ અન્વયે ૫૯ કરોડ ૮૭ લાખના ખર્ચે થનારા ૮૩૫ જેટલા નંદ ઘરનું અને વિવિધ સેજા કેન્દ્રોના ઈ- ખાતમુહૂર્ત – લોકાર્પણ સંપન્ન કર્યા હતા. તેમણે રાજ્યની આંગણવાડી નંદઘરમાં વિવિધ માળખાકીય સુવિધાઓના મોનિટરિંગ માટેની નંદ ઘર ઇન્ફર્મેશન ટ્રેકિંગ એપ્લિકેશન અને ડેશ બોર્ડના ઈ-લોન્ચિંગ પણ ગાંધીનગરથી કર્યા હતા. મુખ્યમંત્રી વિજય રૂપાણીએ રાજ્યની આંગણવાડી-નંદઘરમાં બાળગોપાળની સાર-સંભાળ રાખતી કાર્યકર અને તેડાગર બહેનોની શ્રેષ્ઠતાનું સન્માન કરતાં રાજ્યકક્ષાના માતા યશોદા એવોર્ડ બે બહેનોને તેમજ મહિલા પુરસ્કારો પાંચ વ્યક્તિ વિશેષોને અર્પણ કર્યા હતા.
તેમણે આ આંગણવાડી વર્કર બહેનોને ફ્રન્ટલાઈન વોરિયર્સ તરીકે નવાજતા કહ્યું કે, આ બહેનોની સેવાઓ અભિનંદનને પાત્ર છે. વિજય રૂપાણીએ મહિલા શક્તિના ગૌરવ અને સન્માનની આપણી પરંપરામાં સ્ત્રી દાક્ષિણ્ય સમાયેલું છે તેનો વિશેષ ઉલ્લેખ કર્યો હતો. મુખ્યમંત્રીએ જણાવ્યું કે રાજ્ય સરકારે માતા બહેનોના સર્વગ્રાહી ઉત્કર્ષ, કલ્યાણ અને મહિલા સુરક્ષાના પગલાઓમાં વિશેષ ધ્યાન આપીને ગાંધી, સરદાર સાહેબ તથા નરેન્દ્રભાઈના ગુજરાતની પ્રતિષ્ઠા વધુ ઉન્નત બનાવી છે. તેમણે સ્વચ્છ-સ્વસ્થ ભારત, સહી પોષણ દેશ રોશનનો આ બહુવિધ સંકલ્પ સાકાર કરતા અવસરને સફળતાપૂર્વક રાજ્યમાં પાર પાડવા માટે વિભાગને અભિનંદન આપ્યા હતા. મહિલા બાળ વિકાસ મંત્રીશ્રી ગણપતસિંહ વસાવાએ કોરોના સંક્રમણ સામે મહિલા શક્તિની જાગૃતિનો આ પ્રયોગ દિશા દર્શક બનશે તેવો વિશ્વાસ દર્શાવ્યો હતો.