અમદાવાદ,સમગ્ર દેશની પ્રજાને અચ્છે દિનના સ્વપ્ના બતાવી સત્તા મેળવનાર ભાજપ સરકારે બે વર્ષની ઉજવણીના તાયફાઓ વચ્ચે સર્વિસ ટેક્ષ વધારીને ૧૫ ટકા કરવા ઉપરાંત પેટ્રોલ ડીઝલના ભાવમાં ધરખમ વધારો કરવા સાથે મોંઘવારીનો કમરતોડ બોજો ઝીંકી પ્રજાની ક્રુર મશ્કરી કરી છે તેમ ગુજરાત પ્રદેશ કોંગ્રેસના પ્રવક્તા ડૉ. હિમાંશુ પટેલે જણાવ્યું છે. કોંગ્રેસના પ્રદેશ પ્રવક્તા ડૉ. હિમાંશુ પટેલે જણાવ્યું છે કે, માત્ર ને માત્ર સત્તા લાલસા માટે અચ્છે દિનના સ્વપ્ન બતાવનાર ભાજપ સરકારનું ગુજરાત મોડેલ ફક્ત બે વર્ષમાં પ્રજાજનો માટે દુઃખદ અને અસહ્ય બની ગયું છે.
ભાજપ દ્વારા મોદી સરકારની પ્રશસ્તી માટે દેશભરમાં બે વર્ષની ઉજવણીના તાયફાઓ કરી કરોડો રૃપિયા વેડફવામાં આવી રહ્યા છે ત્યારે બીજી તરફ આજથી સર્વિસ ટેક્ષમાં વધારો કરી ૧૫ ટકા કરવામાં આવ્યો છે. ઉપરથી આજે જ પેટ્રોલ અને ડીઝલના ભાવમાં પણ લીટરે ૨.૫૦ જેટલો તોતીંગ વધારો કરી સામાન્ય પ્રજાની કમરતોડી નાંખવામાં આવી છે.ભાજપ સરકાર દ્વારા છેલ્લા એક વર્ષમાં ત્રણ ટકા જેટલો સર્વિસ ટેક્ષમાં વધારો ઝીંકી પ્રજાના બજેટને વેરવિખેર કરી નાંખવામાં આવ્યું છે. અત્યારે કૃષિ કલ્યાણના નામે ઝીંકાયેલા સેસ ઉપરાંત અગાઉ સ્વચ્છ ભારતનો સેસ ઝીંકવામાં આવ્યો હતો.ટેક્ષ ધીમે ધીમે વધારીને ગુડઝ એન્ડ સર્વિસ ટેક્ષ જેટલો એટલે કે ૧૮ ટકા સુધી વધારવાનો અંદાજ છે. જેના પરીણામે આ અચ્છે દિન વાળી આ મોદી સરકારના રાજમાં સામાન્ય પ્રજાને જીવવું દોહ્યું થઈ જશે. ભાજપ સરકારે સર્વિસ ટેક્ષમાં વધારો ઝીંકીને છેલ્લા એક વર્ષમાં જ ૧.૨૦ લાખ કરોડ જેટલી કમાણી માત્ર ને માત્ર સેસથી કરી છે. આજથી કૃષિ કલ્યાણ સેસ લગાવીને સર્વિસ ટેક્ષ ૧૫ ટકા કરવામાં આવતા સરકારને વધારાના પાંચ હજાર કરોડ મળશે.