લડાકુ વિમાનો અને હેલિકોપ્ટર પણ તૈનાત કરાયાં
ભારતે પણ ટેન્ક, હોવિત્સઝર ગન્સ, એન્ટી ટેન્ક મિસાઈલ, સ્નાઈપર રાઈફલ જેવા હથિયારો ગોઠવી દીધા છે
(સંપૂર્ણ સમાચાર સેવા)
નવી દિલ્હી, તા. ૧૩
ભારત અને ચીન વચ્ચે લદ્‌ઘાખ મોરચે ગમે ત્યારે યુધ્ધ થાય તેવી સ્થિતિ પ્રવર્તી રહી છે. લદ્દાખમાં સીમાએ બંને તરફ સેનાઓએ ટેન્કો, મશીનગન સહિતના આધુનિક હથિયારોનો ખડકલો કરી દીધો છે. બંને દેશની વાયુસેના પણ આ મોરચે પોતાની તાકાતમાં વધારો કરી રહી છે. બંને દેશો વચ્ચે છેલ્લા કેટલાક સમયથી ચાલી રહેલી વાટાઘાટોનુ કોઈ પરિણામ હજી સુધી આવ્યું નથી. બીજી તરફ, આ મોરચા પર ચીને લાઈટ ટેન્ક, ઈન્ફન્ટ્રી ફાઇટિંગ વ્હિકલ્સ, હોવિત્ઝર ગન્સ, એન્ટી ટેન્ક ગાઈડેડ મિસાઈલ્સ, લાઈટ મશિનગન, હેવી મશિનગન, સ્નાઈપર રાઈફ્લ્સ જેવા સરંજામથી સૈનિકોને સજ્જ કરી દીધા છે.
જવાબમાં ભારતે પણ ટેન્ક, હોવિત્સઝર ગન્સ, એન્ટી ટેન્ક મિસાઈલ્સ, સ્નાઈપર રાઈફલ જેવા હથિયારો ગોઠવી દીધા છે. બંને દેશની વાયુસેના પણ સજ્જ છે. ભારત અને ચીનના લડાકુ વિમાનો તેમજ હેલિકોપ્ટર તૈનાત થઈ ગયા છે. ચીને તો પોતાના પાંચમી જનરેશનના લડાકુ વિમાન સરહદ નજીકના એરબેઝ પર તૈનાત કર્યા છે.
પૈંગોંગ લેકના ફિંગર ચાર વિસ્તારમાં તો માત્ર ૧.૭ કિલોમીટરના અંતરે ભારત અને ચીનની સેના આમને સામને છે.તો દક્ષિણ પેંગોંગમાં તો ભારત અને ચીનના સૈનિકો વચ્ચે માત્ર ૧૭૦ મીટરનુ અંતર છે.રેઝાંગ લામાં ૫૦૦ મીટર અને ગોગરા પોસ્ટ પર પણ ૫૦૦ મીટરના અંતરે બંને દેશના સૈનિકો આમને સામને છે. દેપસાંગમાં તો ભારત અને ચીનની ટેન્કો વચ્ચે છ જ કિમીનુ અંતર છે.

સોશિયલ ડિસ્ટન્સિંગ રાખવું ખુબ જરૂરી : મોદી
બિહારમાં લોકાર્પણ કાર્યક્રમ વેળા વડાપ્રધાન મોદીનું સૂચન
(સંપૂર્ણ સમાચાર સેવા)
નવી દિલ્હી, તા. ૧૩
કોરોનાનું સંક્રમણ વધી રહ્યુ છે અને દેશમાં રોજ એક લાખ જેટલા નવા કેસ સામે આવી રહ્યા છે ત્યારે આજે વડાપ્રધાન નરેન્દ્ર મોદીએ પણ કોરોનાથી સાવચેત રહેવા માટે લોકોને સંદેશો આપ્યો હતો. બિહારમાં પેટ્રોલિયમ યોજનાઓનું લોકાર્પણ કરતી વખતે પીએમ મોદીએ કોરોનાનો ઉલ્લેખ કર્યો હતો.તેમણે કહ્યું હતું કે, કોરોના આપણી વચ્ચે જ છે. જ્યાં સુધી તેની દવા શોધાય નહીં ત્યાં સુધી તેને હળવાશથી લેવાની જરુર નથી.
તેમણે લોકોને સંદેશો આપ્યો હતો કે, સોશ્યલ ડિસ્ટન્સિંગ રાખવુ જરુરી છે, સાબુથી નિયમિત હાથ ધોવા જોઈએ. ગમે ત્યાં થુંકવુ જોઈએ નહી અને ચહેરા પર માસ્ક પહેરવો જરુરી છે.આ તમામ બાબતોનું પોતે પાલન કરો અને બીજાને પણ તેનુ પાલન કરવા માટે યાદ દેવડાવતા રહો.
ઉલ્લેખનીય છે કે, ભારતમાં કોરોનાના કેસ ઝડપથી વધી રહ્યા છે.ભારત કોરોનાનુ એપી સેન્ટર બનવા જઈ રહ્યુ હોય તેવી સ્થિતિ છે.હાલમાં ભારતમાં કોરોનાના ૯.૫૮ લાખ એક્ટિવ કેસ છે.જ્યારે ૩૬ .૨૪ લાખ લોકો સાજા થઈ ચુક્યા છે.દેશમાં અત્યાર સુધીમાં ૭૭૦૦૦ લોકો કોરોનાથી જીવ ગુમાવી ચુક્યા છે.

પૂર્વ સંધ્યાએ કરાયેલા ટેસ્ટમાં પ સાંસદ પોઝિટિવ
સત્રની શરૂઆત પહેલાં દરેક સાંસદોના કોરોના ટેસ્ટ થઈ રહ્યાં છે : સભ્યએ કોરોના દિશાનિર્દેશનું પાલન કરવું પડશે
(સંપૂર્ણ સમાચાર સેવા)
નવી દિલ્હી, તા. ૧૩
સંસદના ચોમાસું સત્રનો સોમવારથી પ્રારંભ થશે. આ વચ્ચે લોકસભાના પાંચ સાંસદો કોરોનાથી ચેપગ્રસ્ત બન્યા છે. સત્રની શરૂઆત પહેલાં દરેક સાંસદોના કોરોના ટેસ્ટ થઈ રહ્યાં છે. જેમાં અત્યાર સુધીમાં પાંચ સાંસદનોના રિપોર્ટ પોઝિટિવ આવ્યા છે. હજી અન્ય સાંસદોના ટેસ્ટ કરવામાં આવી રહ્યાં છે.
કોરના સંકટના કારણે આ વખતે સંસદ સત્ર ઘણું જ બદલાયેલું રહેશે. સત્ર દરમિયાન સાંસદોએ કોરોના દિશાનિર્દેશનું પાલન કરવું પડશે. આ વખતે લોકસભાની કાર્યવાહી ચાર કલાક ચાલશે, શૂન્યકાળની સમય મર્યાદા ઘટાડીને અડધી કલાકની કરી દીધી છે.
ઉપરાષ્ટ્રપતિના સચિવાલય તરફથી જણાવવામાં આવ્યું કે, સંસદના ચોમાસું સત્ર પહેલાં રાજ્યસભાના સભાપતિ વેંકૈયા નાયડૂએ પોતાનો કોરોના ટેસ્ટ કરાવ્યો. દરેક સભ્યો સત્ર શરૂ થવાના ૭૨ કલાક પહેલા પોતાના કોરોના ટેસ્ટ કરાવી રહ્યાં છે . સંસદની કાર્યવાહીમાં ભાગ લેવા માટે દરેક સભ્યોનો કોરોના રિપોર્ટ નેગેટિવ હોવો જરૂરી છે.
મીડિયા અને પ્રોટોકોલ પ્રભાગના અધ્યક્ષે જણાવ્યું કે, કેન્દ્રીય ગૃહમંત્રી અમિત શાહને ૩૦ ઓગસ્ટના રોજ પોસ્ટ કોવિડ સારવાર બાદ એમ્સમાંથી ડિસ્ચાર્જ કરવામાં આવ્યા હતાં. એ સમયે આપવામાં આવેલી સલાહ પ્રમાણએ તેમને હવે સંસદના સત્ર પહેલા એક-બે દિવસ માટે પૂર્ણ ટ્રિટમેન્ટ માટે એડમિટ કરવામાં આવ્યા છે.
કોંગ્રેસના સિનિયર નેતા અને લોકસભાના વિરોધ પક્ષના નેતા અધીર રંજન ચૌધરીએ કહ્યું કે, અમે આગામી સત્રમાં બેરોજગારી, પ્રવાસી મજુરોની સ્થિતિ અને દેશમાં આર્થિક પરિદૃશ્યના મુદ્દે ચર્ચા કરવાનો પ્રસ્તાવ આપ્યો છે. અમે સરકારને આગ્રહ કર્યો છે કે સંસદમાં અમારી અવાજ સાંભળવામાં આવે. અમારા દ્વારા ઉઠાવવામાં આવેલા મુદ્દાને ધ્યાનમાં રાખીને અધ્યક્ષે ૧૫ સપ્ટેમ્બરે વેપાર સલાહકાર સમિતિની વધુ એક બેઠક બોલાવી છે.
ઉલ્લેખનીય છે કે, સંસદનું ચોમાસું સત્ર સોમવારથી શરૂ થવાનું છે. ૧૪ સપ્ટેમ્બરથી ૧લી ઓક્ટોબર સુધી ચાલનારું સંસદનું આ સત્ર સવારે ૯ થી બપોરે ૧ અને સાંજે ૩ થી રાત્રે ૭ વાગ્યા સુધી બે શિફ્ટમાં ચાલવાનું છે. કોરોનાની સ્થિતિને ધ્યાનમાં રાખીને આ વખતે સાવચેતીના ભાગરૂપે બધા જ સાંસદોના કોરોના ટેસ્ટ થયાં બાદ જ સત્ર શરૂ થશે અને કોરોનાના કારણે આ વખતે સત્ર ઘણું જ બદલાયેલું રહેશે.