મેલ-એક્સપ્રેસ ટ્રેનમાંથી હવે સ્લીપર કોચ દૂર કરી દેવાશે

રેલવે મંત્રાલયનો નવો પ્લાન તૈયાર
કોરોના વચ્ચે ૧૭ ઓક્ટોબરથી અમદાવાદ-મુંબઈ રૂટ પર ખાનગી તેજસ ટ્રેન ફરી શરૂ કરાશે : એસી કોચ રહેશે
(સંપૂર્ણ સમાચાર સેવા)
નવી દિલ્હી, તા. ૧૧
ભારતીય રેલવે રેલ નેટવર્કને સુધારવાનું વિચારી રહી છે. સ્વર્ણિમ ચતુર્ભુજ યોજના હેઠળ, લાંબા અંતરની મેઇલ અને એક્સપ્રેસ ટ્રેનોમાંથી સ્લીપર કોચને સંપૂર્ણપણે દૂર કરાશે. એટલે કે, આ ટ્રેનોમાં ફક્ત એસી કોચ જ રહેશે. આવી ટ્રેનની ગતિ પ્રતિ કલાક ૧૩૦/૧૬૦ કિમી હશે. જ્યારે મેઇલ અને એક્સપ્રેસ ટ્રેનો ૧૩૦ ગતિ પ્રતિ કલાક અથવા વધુ ઝડપે દોડે છે ત્યારે નોન-એસી કોચ તકનીકી સમસ્યાઓનું કારણ બને છે. તો આવી બધી ટ્રેનોમાંથી સ્લીપર કોચને દૂર કરવામાં આવશે. હાલમાં લાંબા અંતરની મેલ અને એક્સપ્રેસ ટ્રેનમાં ૮૩ એસી કોચ લગાવવાની દરખાસ્ત છે. જો કે, આ વર્ષના અંત સુધીમાં કોચની સંખ્યા વધારીને ૧૦૦ કરવામાં આવશે. આવતા વર્ષે કોચની સંખ્યા વધારીને ૨૦૦ કરવાની યોજના છે. એટલે કે, આગામી સમયમાં આ પ્રવાસ વધુ આરામદાયક અને ઓછો સમય લેશે. સારી વાત એ છે કે સામાન્ય એસી કોચ કરતા ભાડુ ઓછું રાખવાની યોજના છે. જો કે, આનો અર્થ એ નથી કે હવે કોઈ ટ્રેનમાં નોન-એસી કોચ રહેશે નહીં. હકીકતમાં, નોન-એસી કોચવાળી ટ્રેનોની ગતિ એસી કોચવાળી ટ્રેનો કરતા ઓછી હશે. મળતી માહિતી પ્રમાણે આવી ટ્રેનો ૧૧૦ કિમી પ્રતિ કલાકની ઝડપે દોડશે. આ તમામ કામ તબક્કાવાર રીતે કરવામાં આવશે, સાથે સાથે નવા અનુભવોમાંથી પાઠ લઈને આગળની યોજના પણ કરવામાં આવશે. ખાનગી તેજસ ટ્રેનો પણ ૧૭ ઓક્ટોબરથી શરૂ થશે. આઈઆરસીટીસીએ બુધવારે તેની જાહેરાત કરી છે. તેજસ ટ્રેનની ટિકિટ બુકિંગ ૮ ઓક્ટોબરથી શરૂ થઈ ગયું છે. કોરોના સમયગાળા દરમિયાન, તેજસ એક્સપ્રેસ ટ્રેનો ૭ મહિનાથી બંધ છે. પરંતુ હવે તેની શરૂઆત કરવામાં આવી રહી છે. કંપનીના જણાવ્યા અનુસાર, આ ટ્રેનો ૧૭ ઓક્ટોબરથી લખનઉ-નવી દિલ્હી અને અમદાવાદ-મુંબઇ રૂટ પર ફરી કામગીરી શરૂ કરશે.