જેએનયુ વિખવાદનો સુત્રધાર ઉમર ખાલિદ છે ઃ નવો ધડાકો

સંસદ પર હુમલાના અપરાધી અફઝલ ગુરુને ફાંસીના વિરોધમાં જવાહરલાલ નહેરુ યુનિવર્સિટીમાં યોજાયેલા કાર્યક્રમની રુપરેખા ઉંમર ખાલિદ નામના શખ્સે તૈયાર કરી હતી. ઉંમર ખાલિદ જેએનયુ વિવાદનો મુખ્ય સૂત્રધાર છે. કાશ્મીરી યુવાનો સાથે મળીને આ કાર્યક્રમ તૈયાર કરાયો હતો. આ ખુલાસો પોલીસ દ્વારા ધરપકડ કરવામાં આવેલા જેએનયુ વિદ્યાર્થી યુનિયનના લીડર કનૈયાકુમારે કર્યો છે. મળેલી માહિતી મુજબ ઉંમર ખાલિદ કાશ્મીરી અલગતાવાદીઓ સાથે સંબંધ ધરાવે છે. કનૈયાના ખુલાસા મુજબ ઉંમરની પાસે કાશ્મીરથી અનેક શકમંદ યુવાનો આવતા હતા. કનૈયાએ આક્ષેપ કર્યો છે કે, કાશ્મીરી યુવાનોએ ભારત વિરોધીપણ સપાટી ઉપર આવી છે કે, ભારતના ટુકડા કરવા અને અફઝલ ગુરુની શહીદીની તરફેણમાં નારા લગાવવામાં આવ્યા હતા. આ નારાબાજી કાશ્મીરી યુવાનોએ જ કરી હતી. સાતમી ફેબ્રુઆરીના દિવસે જેએનયુ સંકુલમાં ૧૦ કાશ્મીરી યુવાનો આવ્યા હતા. ઉંમર ખાલિદે મહિનાઓ સુધી આ પ્રકારના કાર્યક્રમો આયોજિત કરવાની યોજના બનાવી હતી. કાશ્મીરી યુવાનોની ઘુસણખોરીના બે દિવસ બાદ જેએનયુમાં મોટો વિવાદ થયો હતો. વિદ્યાર્થીઓના એક ગ્રુપે અફઝલ અને ભટ્ટની ફાંસીને ન્યાયિક હત્યા ગણાવીને દેખાવો કર્યા હતા. વિદ્યાર્થીઓએ દેશદ્રોહી નારા લગાવ્યા હતા. ઘટના બાદ પોલીસે કાર્યવાહી કરીને કનૈયા કુમારની ધરપકડ કરી હતી જે હાલ રિમાન્ડ ઉપર છે. ધીમે ધીમે આ મામલો રાજકીય બની ગયો હતો. જવાહરલાલ નહેરુ યુનિવર્સિટીમાં વિવાદ અકબંધ છે ત્યારે કેટલીક ચોંકાવનારી બાબતો સપાટી ઉપર આવી છે. સંસદ પર હુમલાના અપરાધી અને જેને ફાંસી અપાઈ હતી તે અફઝલ ગુરુની મોતની તારીખ પહેલા બે દિવસ પૂર્વે જેએનયુ કેમ્પસમાં ૧૦ કાશ્મીરીઓ આવ્યા હતા. નવી વિગતો હજુ પણ ખુલી શકે છે. કનૈયા કુમાર સીપીઆઈ સંલગ્ન ઓલ ઇન્ડિયા સ્ટુડન્ટ ફેડરેશન સાથે જોડાયેલો છે. કેન્દ્રીય ગૃહમંત્રી રાજનાથસિંહ પહેલાથી જ દાવો કરી ચુક્યા છે કે, જેએનયુ કેમ્પસમાં આયોજિત કાર્યક્રમને પાકિસ્તાન સ્થિત ત્રાસવાદી સંગઠન લશ્કરે તોઇબાના લીડર હાફીઝ સઇદનો ટેકો હતો. આ મામલે હાલમાં જોરદાર રાજનીતિ ચાલી રહી છે. ભાજપ અને કોંગ્રેસ આમને સામને આવી ગયા છે. એકબીજા ઉપર આક્ષેપબાજી કરવામાં આવી રહી છે. આવા સમયમાં હવે નવી વિગત ખુલી છે.