મેલબોર્નમાં ૫.૯ની તીવ્રતાનો ભૂકંપ

બુધવારે સવારે ૯ વાગ્યે (સ્થાનિક સમય) ઓસ્ટ્રેલિયાના દક્ષિણ-પૂર્વમાં આવેલા શહેર મેલબોર્નમાં શક્તિશાળી ભૂકંપ આવ્યો હતો. ૫.૯ના રિક્ટર સ્કેલના ભૂકંપથી મેલબોર્નની ધરા ધ્રુજી ઉઠી હતી. આ ભૂકંપ એટલો ભયાનક હતો કે, ઈમારતો હલી ગઈ હતી અને દિવાલો ધરાશાયી થઈ હતી. અચાનક આવેલા ભૂકંપના કારણે સ્થાનિકોમાં ભયનો માહોલ જાેવા મળ્યો હતો. મીડિયા રિપોર્ટ પ્રમાણે, ભૂકંપના કારણે ઘણી બધી ઈમારતોને નુકસાન પહોંચ્યું છે. ઓસ્ટ્રેલિયાના બીજા સૌથી મોટા શહેરમાં આવેલા ભૂકંપના આંચકા સેંકડો કિલોમીટર સુધી અનુભવાયા હતા. મેલબોર્નમાં આવેલો આ ભૂકંપ દુર્લભ કહી શકાય કારણકે અહીં ભાગ્યે જ ભૂકંપ આવે છે. ભૂકંપનું કેંદ્રબિંદુ વિક્ટોરિયા સ્ટેટના મેન્સફિલ્ડમાં નોંધાયું હતું. આ સ્થળ ઉત્તરપૂર્વ મેલબોર્નથી ૨૦૦ કિલોમીટર દૂર છે. ભૂકંપની ઊંડાઈ જમીનથી ૧૦ કિલોમીટર ઊંડે હતી અને આફ્ટરશૉકનો રેટ ૪.૦ નોંધાયો હતો. ભૂકંપના કારણે ભયભીત લોકો રસ્તા પર ઊતરી આવ્યા હતા. ભૂકંપ બાદ મેલબોર્નની ચેપલ સ્ટ્રીટમાં ચારેતરફ કાટમાળ જાેવા મળ્યો હતો. ઈમારતોમાંથી ઈંટો અને પથ્થર તૂટીને રસ્તા પર પડ્યા હતા. સોશિયલ મીડિયા પર અનેક વિડીયો અને તસવીરો વાયરલ થઈ રહ્યા છે જેમાં ભૂકંપના કારણે થયેલા નુકસાનનો અંદાજ લગાવી શકાય છે. મેલબોર્નના ઉત્તર ભાગમાં રહેતા લોકોએ સોશિયલ મીડિયા પર જણાવ્યું હતું કે, તેમના વિસ્તારમાં વીજ પુરવઠો ખોરવાઈ ગયો હતો અને લોકોને બિલ્ડિંગ ખાલી કરવાની સૂચના અપાઈ હતી. મેલબોર્નથી ૮૦૦ કિલોમીટર દૂર આવેલા એડલિડ અને ૯૦૦ કિલોમીટર દૂર આવેલા સિડનીમાં પણ ભૂકંપ અનુભવાયો હતો. જાેકે, મેલબોર્ન સિવાયના કોઈપણ સ્થળે નુકસાન કે લોકોને ઈજા થયાના અહેવાલો નથી. પ્રાઈમ મિનિસ્ટર સ્કોટ મોરિસને મીડિયાને જણાવ્યું કે, કોઈને ગંભીર ઈજા પહોંચી હોય કે જાનમાલને ભારે નુકસાન થયું હોય તેવી કોઈ માહિતી મળી નથી, જે સારા સમાચાર છે. અમને આશા છે કે, આ સમાચાર જળવાઈ રહેશે. આ તરફ મેલબોર્નમાં ભૂકંપનો અનુભવ કરનારા એક કેફેના માલિક ઝૂમે ફિમે જણાવ્યું, ભૂકંપ આવતાની સાથે જ હું બહાર નીકળી ગયો અને રોડ તરફ દોટ મૂકી હતી. આખી બિલ્ડિંગ ધ્રુજી રહી હતી. બારીઓ અને કાચ હલી રહ્યા હતા. એવું લાગ્યું કે જાણે કોઈ શક્તિશાળી મોજું આવ્યું હોય. મેં પહેલા ક્યારેય આવું નથી અનુભવ્યું. આ ભયભીત કરનારો અનુભવ હતો. ઉલ્લેખનીય છે કે, ઓસ્ટ્રેલિયાનો દક્ષિણ-પૂર્વ ભાગ ભૂકંપ માટે જાણીતો નથી. એટલે જ અહીં ભૂકંપ આવવાની ઘટના દુર્લભ કહેવાય છે. મેલબોર્નના એક કેફેમાં કામ કરતાં પાર્કર માયોએ જણાવ્યું, આ ભયાવહ હતું. ભૂકંપ આવતાં અમે સૌ અચંબિત થયા છીએ. અહીં ૧૮૦૦ની સાલમાં શક્તિશાળી ભૂકંપ આવ્યો હતો. ત્યારબાદ કોઈપણ મોટા ભૂકંપે અહીં નુકસાન નથી પહોંચાડ્યું. અહીં ૧૦-૨૦ વર્ષે એકવાર ભૂકંપ આવે છે. છેલ્લે ૨૦૧૨માં અહીં ભૂકંપના આંચકા અનુભવાયા હતા.