રાજ્યસભાની ૧૧ બેઠક પર ૯ નવેમ્બરે મતદાન યોજાશે

ચૂંટણી પંચ દેશમાં ચૂંટણી યોજવા મક્કમ
યુપીની ૧૦ અને ઉત્તરાખંડની એક સીટ પર ચૂંટણી યોજાશે
(સંપૂર્ણ સમાચાર સેવા)
નવી દિલ્હી, તા. ૧૩
ચૂંટણી પંચ દ્રારા રાજ્યસભાની ૧૧ સીટો પર ચૂંટણી કાર્યક્રમની જાહેરાત કરી દેવામાં આવી છે. જે મુજબ ઉત્તર પ્રદેશની ૧૦ સીટો અને ઉત્તરાખંડની એક સીટ પર રાજ્યસભા ચૂંટણી યોજાશે. આ તમામ ૧૧ સીટો પર ૨૭ ઓક્ટોબરે ઉમેદવાર ફોર્મ ભરાશે અને ૯ નવેમ્બરે મતદાન થશે. ચૂંટણી પરિણામ ૧૧ નવેમ્બરે જાહેર કરાશે.
ઉલ્લેખનીય છે કે, ૨૫ નવેમ્બપે ઉત્તર પ્રદેશથી રાજ્યસભાના ૧૦ સભ્યોનો કાર્યકાળ સમાપ્ત થઇ રહ્યો છે. જેમાં સૌથી વધારે સપાના સભ્યો છે. ઉત્તરાખંડથી કોંગ્રેસના રાજ્યસભા સાંસદ રાજ બબ્બરનો કાર્યકાળ સમાપ્ત થઇ રહ્યો છે.
બીજી તરફ યુપી વિધાનસભામાં વર્તમાન સમયમાં ૩૯૫ ધારાસભ્યો છે અને ૮ સીટો ખાલી છે. જેમાંથી સાત સીટો માટે પેટાચૂંટણી યોજાશે. યુપીમાં હાલમાં બીજેપી પાસે ૩૦૬ ધારાસભ્યો છે જ્યારે ૯ અપના દળ અને ૩ નિર્દળીય ધારાસભ્યોના સમર્થન મળેલ છે. બાકીમાં સપા ૪૮, કોંગ્રેસ પાસે સાત, બસપાના ૧૮ અને ઓમ પ્રકાશ રાજભર પાર્ટીના ચાર ધારાસભ્યો છે.
રાજ્યસભામાં કુલ ૨૪૫ સભ્યો છે, જેમાંથી ભાજપ નેતૃત્વવાળા એનડીએ પાસે ૧૦૦થી વધુ સભ્યો છે. બીજેપી ૮૫, જેડીયુ ૫, બીપીએફ ૧, આરપીઆઇ ૧, એનપીએફ ૧, એમએનએફ ૧ અને બાકીના સાત સભ્યો સાથે કુલ ૧૦૧ સભ્યોનું સમર્થન છે.