રાહુલ કોંગ્રેસ અધ્યક્ષ બનશે કે નહીં : સોનિયાને સવાલ

ચોમાસુ સત્ર પહેલા ફરીથી વર્ચ્યુઅલ બેઠક કરશે
સંગઠનમાં આમૂલ પરિવર્તનને લઈ પત્ર લખનારા પાર્ટીના નેતા સોનિયાને અધ્યક્ષ પદને લઈ સ્પષ્ટ કરવાની વાત કરી
(સંપૂર્ણ સમાચાર સેવા)
નવી દિલ્હી,તા.૬
પાર્ટી નેતૃત્વને લઈ કૉંગ્રેસમાં ફરી એકવાર પરસ્પર નારાજગી જોવા મળી શકે છે. મૂળે, ૧૪ સપ્ટેમ્બરથી શરૂ થઈ રહેલા સંસદના ચોમાસુ સત્ર પહેલા કૉંગ્રેસના તમામ નેતા ફરી એકવાર વર્ચ્યૂઅલ રીતે એકત્ર થવાના છે. સીડબ્લ્યુસીની બેઠક બાદ જે રીતે પાર્ટીની અંદર વિવાદ થયો હતો, ત્યારબાદ આ પહેલી વાર હશે જ્યારે કૉંગ્રેસના તમામ નેતા સામ-સામે હશે. આ દરમિયાન અહેવાલ આવ્યા છે કે સંગઠનમાં આમૂલ પરિવર્તનને લઈ પત્ર લખનારા પાર્ટીના નેતા હવે સોનિયા ગાંધીને અધ્યક્ષ પદને લઈ સ્થિતિ સ્પષ્ટ કરવાની વાત કરવા લાગ્યા છે. નોંધનીય છે કે આ બેઠકમાં કૉંગ્રેસ અધ્યક્ષ સોનિયા ગાંધી, પૂર્વ વડાપ્રધાન મનમોહન સિંહ, કૉંગ્રેસ નેતા રાહુલ ગાંધી અને પૂર્વ રક્ષા મંત્રી એકે અન્ટની પણ સામેલ હશે. નોંધનીય છે કે, સીડબ્લ્યુસીની મીટિંગ પહેલા કૉંગ્રેસમાં જ રીતે પત્ર બોમ્બ ફાટ્યો હતો, ત્યારબાદથી કૉંગ્રેસ નેતા બે કેમ્પમાં વહેંચાઈ ગયા હતા. જોકે પાર્ટીએ બાદમાં કહ્યું કે તમામ નેતાઓ સાથે વાત કરી વિવાદ પર પૂર્ણવિરામ લગાવી દેવામાં આવ્યો છે. નોંધનીય છે કે, સીડબ્લ્યુસીની મીટિંગમાં મનમોહન સિંહ, એકે એન્ટની અને રાહુલ ગાંધી સહિત અનેક લોકોએ પત્ર લખનારા ૨૩ નેતાઓની આકરી ટીકા કરી હતી. જોકે સોનિયા ગાંધીને પત્ર લખનારા ૨૩ નેતાઓએ હજુ સુધી પોતાનું વલણ બદલ્યું નથી. સોનિયા ગાંધીની જીવની લખનારા રશીદ કિદવઈ મુજબ, સોનિયા ગાંધીને પત્ર લખનારા નેતાઓ ઈચ્છે છે કે રાહુલ ગાંધી સ્પષ્ટ કરે કે તેઓ પોતાને અધ્યક્ષ પદનો ઉમેદવાર જાહેર કરશે કે નહીં. પાર્ટીની આંતરિક કલહને શાંત કરવાની જવાબદારી અનેક વરિષ્ઠ નેતાઓને આપવામાં આવી છે, પરંતુ આ મામલામાં કોઈ ખાસ પ્રગતિ નથી જોવા મળી. નોંધનીય છે કે, સોનિયા ગાંધીને નેતાઓના પત્ર પર ૬ મહિનામાં કોઈ અગત્યના નિર્ણય લેવાની વાત કહેવામાં આવી છે.