રાજ્યમાં વધુ બે ધારાસભ્યો કોરોના વાયરસની ઝપેટમાં

સંપર્કમાં આવેલા લોકોને ચેતવા સુચના આપી
કરંજ વિધાનસભા બેઠકના ધારાસભ્ય પ્રવિણ ઘોઘારી, રાજુલા બેઠકના ધારાસભ્ય અંબરીશ ડેરને કોરોના થયો
(સંપૂર્ણ સમાચાર સેવા)
અમદાવાદ,તા.૬
રાજ્યમાં કોરોના વાયરસનો હાહાકાર મચી ગયો છે. તેવામાં વધુ બે નેતાઓ કોરોનાની ઝપટમાં આવ્યા છે. રાજ્યની સુરત જિલ્લાના કરંજ વિધાનસભા બેઠકના ધારાસભ્ય પ્રવિણ ઘોઘારી અને અમરેલી જિલ્લાની રાજુલા બેઠકના ધારાસભ્ય અંબરીશ ડેરને કોરોના થયો છે. અંબરીશ ડેર પોતાના ફાર્મ હાઉસ પર ક્વૉરન્ટાઇન થયા છે તો ઘોઘારીએ પણ સારવાર લેવાની શરૂઆત કરી છે. દરમિયાન આ બંને નેતા જાહેર જીવન સાથે જોડાયેલા છે તેથી તેમનો અનેક લોકો સાથે સંપર્ક થતો હોય છે, ત્યારે કોરોનાની સરકારી ગાઇડ લાઇન મુજબ તેમના ક્લૉઝ કોન્ટેક્ટમાં આવેલા લોકોએ તકેદારી રાખવી અને થોડા દિવસ એકાંતમાં પસાર કરવાનો અનુરોધ કરવામાં આવ્યો છે. અથવા તો કોઈને લક્ષણ જણાય તો ટેસ્ટ કરાવવાનો અનુરોધ કરવામાં આવ્યો છે. અગાઉ ભાજપના વાઘોડિયાના ધારાસભ્ય મધુ શ્રીવાસ્તવ પોઝિટિવ આવ્યા હતા. તેમની સાથે રાજકોટના મેયર બીના આચાર્ય પણ સંક્રમિત થયા હતા. આ ઉપરાંત રાજકોટમાં ધારાસભ્ય અરવિંદ રૈયાણી અને રાજ્યસભાના ઉમેદવાર અભય ભારદ્વાજ કોરોનાની ઝપટમાં આવી ગયા હતા. આમ નેતાઓને કોરોનાનું વળગણ થઈ રહ્યું છે. સરકાર દ્વારા સોશિયલ ડિસ્ટન્સિંગનો નિયમ બનાવવામાં આવ્યો છે છતાં વાયરસના ચેપથી નેતાઓ બચી શક્યા નથી. રાજ્યમાં કોરોના વાયરસનાના કેસમાં વધારો યથાવત્‌ રહ્યો છે. છેલ્લા ૨૪ કલાકમાં ગુજરાતમાં કોરોના વાયરસના ૧૩૧૧ નવા કેસ નોંધાયા છે. જેની સામે ૧૧૪૮ દર્દીઓ સાજા થયા છે. છેલ્લા ૨૪ કલાકમાં રાજ્યમાં કોવિડ-૧૯ના કારણે ૧૬ દર્દીઓના મોત થયા છે. રાજ્યમાં કુલ મૃત્યુઆંક ૩૦૯૪ થયો છે. ૨૪ કલાકમાં સૌથી વધુ સુરતમાં ૨૭૭ કેસ નોંધાયા છે. રાજ્યમાં કોરોનાના કુલ કેસ ૧૦૩૦૦૬ છે. જેમાંથી એક્ટિવ કેસ ૧૬,૩૬૬ છે. આજે રાજ્યમાં કુલ ૭૨,૭૫૧ ટેસ્ટ કરવામાં આવ્યા છે. રાજ્યમાં સાજો થવાનો દર ૮૧.૧૧ ટકા છે.