મહિલા કલ્યાણ યોજનામાં મહિલાને વ્યાજ વગરની લોન

મહિલાઓને આત્મનિર્ભર બનાવવા સરકારની પહેલ
ગુજરાત સરકારે ૧૭૫ કરોડ રૂપિયાનું બજેટ ફાળવવામાં આવ્યું છે : ૧૦ લાખથી વધુ મહિલાઓને લાભ મળશે
(સંપૂર્ણ સમાચાર સેવા)
ગાંધીનગર,તા.૧૩
ગુજરાતની મહિલાઓ માટે એક સારા સમાચાર છે. ગુજરાતની મહિલાઓ સશક્ત, આત્મનિર્ભર બને તે માટે મુખ્યમંત્રી વિજય રૂપાણીએ મહિલા કલ્યાણ યોજના શરૂ કરી છે. જે માટે ગુજરાત સરકારે ૧૭૫ કરોડ રૂપિયાનું બજેટ ફાળવવામાં આવ્યું છે. આ યોજના અંતર્ગત ૧૦ લાખથી વધુ મહિલાઓને વગર વ્યાજની લોન આપવામાં આવશે. આત્મનિર્ભર ભારતના વડાપ્રધાનના સંકલ્પને સાકાર કરવામાં ગુજરાતની મહિલા શક્તિ આગળ આવશે. વડાપ્રાધાન નરેન્દ્ર મોદીના જન્મદિવસે ૧૭ સપ્ટેમ્બરે મુખ્યમંત્રી મહિલા ઉત્કર્ષ યોજનાની રાજ્યની માતૃશક્તિને ભેટ આપવામાં આવશે. આ નિર્ણયથી કોરોના પછીની બદલાયેલી આર્થિક સામાજિક જીવનશૈલીમાં મહિલા માટે આત્મનિર્ભરતાનો નવો માર્ગ ખુલશે. રાજ્યના ૧ લાખ મહિલા જૂથની કુલ ૧૦ લાખ માતા-બહેનોને મુખ્યમંત્રી મહિલા ઉત્કર્ષ યોજનાનો લાભ મળશે. કુલ ૧૦૦૦ કરોડ સુધીનું ધિરાણ મહિલા જૂથોને અપાશે. બેંક લોનનું વ્યાજ રાજ્ય સરકાર ભોગવશે. આ લોન માટે જરૂરી સ્ટેમ્પ ડ્યુટીમાં માફી અપાશે. મહિલા જૂથ દીઠ રૂ. ૧ લાખનું લોન-ધિરાણ સરકારી, સહકારી, ખાનગી બેંકો, આરબીઆઈ માન્ય ધિરાણ સંસ્થાઓમાંથી મળશે. રાજ્ય સરકાર બેન્કો સાથે ટૂંક સમયમાં યોજનામાં જોડાવા અંગેના એમઓયુ કરશે. ૧૦ મહિલાઓ-બહેનોના એક જૂથ એમ ૧ લાખ જૂથ બનાવાશે. પ્રત્યેક જૂથને એક લાખનું લોન ધિરાણ મળશે. પ્રત્યેક માતા-બહેનોને પોતાનો વ્યવસાય, ગૃહ ઉદ્યોગ, વેપાર શરૂ કરવા વગર વ્યાજે લોન ધિરાણ મળી રહેશે. કોરોના પછીની કથળેલી આર્થિક સ્થિતિમાં મહિલાઓને ઘર પરિવારનો આર્થિક આધાર બનવા નાના માણસની મોટી લોનને સાકાર કરવાનો આ હેતુ છે.