યુદ્ધ વિમાન સંબંધિત એરફોર્સના દરેક વિભાગને તાલીમ અપાશે

ફાઈટરના ઉડાનના ત્રણ કલાક પહેલાં પ્રેક્ટિસ
વિમાન આવ્યા ન હતાં તે પહેલાં જવાનોમાં તેની ચર્ચાઓ
(સંપૂર્ણ સમાચાર સેવા)
નવી દિલ્હી, તા. ૧૧
અંબાલા એરબેઝથી નિવૃત્ત થયેલ સાર્જન્ટ ખુશવીરસિંહ દત્તે જણાવ્યું કે ૮૦ના દશકમાં જ્યારે નોકરીમાં હતા ત્યારે જગુઆર ફાઈટર પ્લેન ભારત આવ્યું હતું ,ત્યારે પાયલટ અને ટેકનિકલ સ્ટાફે દિવસ અને રાત તાલીમ લીધી હતી. નિવૃત્ત સાર્જન્ટ ખુશવીરસિંહ જણાવે છે કે જ્યારે હું નોકરી પર હતો ત્યારે જગુઆર ખરીદવામાં આવ્યાં હતા. એરફોર્સની અંદરની વાત કરું તો વાયુસેનાનું મનોબળ મજબૂત થયું હતું. વિમાન આવ્યા ન હતાં તે પહેલાં જ જવાનોમાં તેની ચર્ચાઓ થવા લાગી હતી. જગુઆર આવ્યા બાદ વાયુસેનાનો દરેક સૈનિક તેને જોવા માંગતો હતો. તે સમયમાં જગુઆર બહુ જ શક્તિશાળી હતું. દત્ત વધુમાં કહે છે કે, ફાઈટર ઉડાન ભરવાના ત્રણ કલાક પહેલા પ્રેક્ટિસ શરુ કરવામાં આવે છે. એવું નથી હોતું કે આપ રાત્રે તેને વ્યવસ્થિત હાલતમાં છોડીને ગયા પછી સવારે ફરી તે જ હાલતમાં ઉડાન શરુ કરી શકશો, પરંતુ સવારે ફરી શૂન્યથી શરુ કરવું પડે છે. તમામ પ્રકારની તપાસ બાદ જ તેને રન-વે પર ઉતારવામાં આવે છે.આ તમામ પ્રક્રિયામાં લગભગ ત્રણ કલાક લાગે છે.