તેંડુલકરે મુંબઈમાં પ્લાઝમા થેરપી યુનિટનું ઉદ્ઘાટન કર્યું

લોકોને પ્લાઝ્મા ડોનટ માટે અપીલ કરી

આ થેરપી એકદમ પ્રૅક્ટિકલ હોય તેવા દર્દીઓની સારવાર કરવા શરૂ થઇ છે જે માટે બીએમસીને શુભેચ્છા આપું છું
(સંપૂર્ણ સમાચાર સેવા) મુંબઈ, તા. ૧૦
મુંબઈના અંધેરીમાં આવેલી સેવન હિલ્સ હૉસ્પિટલમાં સચિન તેંડુલકરે ગઈકાલે કોવિડ-૧૯ પ્લાઝમા થેરપી યુનિટનું ઉદ્ઘાટન કર્યું હતું. કોરોનાના દરદીઓના ઈલાજ માટે મુંબઈ મ્યુનિસિપલ કૉર્પોરેશન દ્વારા આ યુનિટ શરૂ કરવામાં આવ્યું છે. આ યુનિટ વિશે વાત કરતાં સચિને કહ્યું કે ‘આપણે કોરોના નામની બીમારીનો સામનો કરી રહ્યા છીએ. આ સમયે દર્દીઓને મદદ કરવા આપણા ડૉક્ટર, નર્સ, પૅરામેડિકલ સ્ટાફ, પોલીસ, સુધરાઈ અને સરકારી-કર્મચારીઓ સતત કામ કરી રહ્યા છે. વિશ્વ સ્તરે સંશોધકો આ બીમારીની દવા શોધી રહ્યા છે. આ પ્લાઝમા થેરપી એકદમ પ્રૅક્ટિકલ હોય તેવા દર્દીઓની સારવાર કરવા માટે શરૂ કરવામાં આવી છે જે માટે હું બીએમસીને અભિનંદન આપું છું. જે લોકો કોરોનામાંથી સંપૂર્ણપણે રિકવર થઈ ગયા છે હું તેમને વિનંતી કરું છું કે તેઓ આગળ આવે અને પ્લાઝમા થેરપી માટે પોતાનું બ્લડ ડોનેટ કરે.