અમદાવાદ,સમગ્ર ગુજરાતમાં ફરી એકવાર હિટવેવનું મોજુ ફરી વળ્યું છે. હવામાન વિભાગ તરફથી આગામી ત્રણ દિવસ માટે હિટવેવની ચેતવણી પણ જારી કરવામાં આવી છે. અમદાવાદ અને રાજ્યના અન્ય ભાગોમાં તાપમાનને લઇને પણ હવે લોકોમાં ચર્ચા છે. કારણ કે, પારો વધુ હોવાની વાત લોકો કરી રહ્યા છે. હવામાન વિભાગ તરફથી તાપમાન અમદાવદામાં આજે ૪૪.૫થી વધુ આંકવામાં આવ્યું છે. આજે રાજ્યના જે ભાગોમાં પારો ૪૪થી ઉપર રહ્યો હતો તેમાં ડિસા, ગાંધીનગર, ઇડર, કંડલા એરપોર્ટ, સુરેન્દ્રનગરનો સમાવેશ થાય છે. બીજી બાજુ અમદાવાદ શહેરના તાપમાનમાં છેલ્લા કેટલાક દિવસોથી વધારો થવા પામ્યો છે.

શહેરમાં તાપમાનનો પારો આગામી બે દિવસ દરમિયાન ૪૫ ડીગ્રી સેલ્સિયસ પર પહોંચવાની હવામાન વિભાગની આગાહીની વચ્ચે તંત્ર દ્વારા રેડએલર્ટ જારી કરવામાં આવ્યું છે.ત્યાં શહેરમાં હીટસ્ટ્રોકની અસરથી દાખલ કરવામાં આવેલા એક વૃધ્ધનું મોત થતાં શહેરમાં અત્યાર સુધીમાં કુલ ૧૮ લોકોના મોત થવા પામ્યા છે.આ અંગે મ્યુનિસિપલ કોર્પોરેશન હેલ્થવિભાગ તરફથી જાણવા મળ્યા મુજબ,શહેરના દાણીલીમડા વિસ્તારમાં રહેતા એક ૭૦ વર્ષના વૃધ્ધને હીટસ્ટ્રોકની અસરને પગલે વી.એસ.હોસ્પિટલમાં સારવાર માટે ગઈકાલે દાખલ કરવામાં આવ્યા હતા.જ્યાં આજે સારવાર દરમિયાન તેમનું મોત થવા પામતા શહેરમાં હીટસ્ટ્રોકને કારણે કુલ મૃત્યુઆંક ૧૮ ઉપર પહોંચવા પામ્યો છે.

અત્યારસુધીમાં લૂ લાગવાના  કારણે શહેરની હોસ્પિટલોમાં કુલ ૯૫ જેટલા દર્દીઓને સારવાર માટે દાખલ કરવામાં આવ્યા હતા.જે પૈકી ૮૭ દર્દીઓ અમદાવાદ શહેરના અને ૮ દર્દીઓ અમદાવાદ બહારથી સારવાર માટે આવેલા હતા.મ્યુનિસિપલ હેલ્થવિભાગ તરફથી આગામી બે દીવસ દરમિયાન તાપમાનનો પારો ૪૫ ડીગ્રી સેલ્સિયસ પર પહોંચવાની આગાહીને પગલે લોકોને વધુ પ્રમાણમાં પાણી પીવા ઉપરાંત છાશ અથવા અન્ય પ્રવાહનું સેવન કરવાની સાથે લાંબો સમય તડકામાં ન રહેવા,હળવા સુતરાઉ કપડા પહેરવા,ઠંડકવાળા સ્થળો પર સમય-સમય પર આરામ કરવા અને બાળકો અને સગર્ભા સ્ત્રીઓનું ખાસ ધ્યાન રાખવા અપીલ કરી છે.

અમદાવાદ સહિત રાજ્યના જુદા જુદા ભાગોમાં હિટવેવના કારણે આજે જનજીવન ખોરવાઈ ગયું હતું. બપોરના ગાળામાં રસ્તાઓ સુમસામ બન્યા હતા. ગરમીના પ્રમાણમાં વધારો થયા બાદ ફરી એકવાર તકેદારી રાખવા માટેની જરૃર દેખાઇ રહી છે. હાલમાં ગરમીનો પારો ૪૮ સુધી પહોંચી ગયો હતો. લુ લાગવાના અથવા તો હિટ સ્ટ્રોકના કેટલાક બનાવો બન્યા હતા. મોત પણ અમદાવાદમાં થયા હતા. ગરમીથી બચવા માટે વધુ પાણી અને છાશનો ઉપયોગ કરવા માટેની સલાહ તંત્ર દ્વારા આપવામાં આવી છે. નિષ્ણાંત તબીબો પણ આવી જ સલાહ આપે છે. ગરમીના પ્રમાણમાં પાણીજન્ય રોગના કેસમાં વધારો થાય છે. જેમાં પેટમાં દુખાવાની ફરિયાદ રહે છે. જાણકાર લોકોના કહેવા મુજબ હજુ થોડાક દિવસ સુધી ઉંચુ તાપમાન રહી શકે છે. બપોરના ગાળામાં ૪૬થી ઉપર તાપમાન અમદાવાદમાં પહોંચ્યું હોવાની બાબત જોવા મળી હતી.

અમદાવાદ,શિક્ષણના ક્ષેત્રમાં અનેક પ્રકારની દુવિધાઓ અને માંગ વચ્ચે આજે ગુજરાત સરકારે મહત્વપૂર્ણ નિર્ણય લેતા ધોરણ ૯, ૧૦, ૧૧ અને ૧૨માં સેમેસ્ટર પદ્ધતિ નાબૂદ કરવાનો નિર્ણય કર્યો હતો. વર્ષ ૨૦૧૭માં લેવામાં આવનાર નીટની પરીક્ષામાં વિદ્યાર્થીઓને કોઇપણ મુશ્કેલી ન પડે તે માટે પુરતા અભ્યાસક્રમની પુરવણી વિદ્યાર્થીઓને ટૂંક સમયમાં જ આપવામાં આવશે. ધોરણ ૧૨ પછીના ઇજનેરી, ફાર્મસીના અભ્યાસક્રમમાં પ્રવેશ માટે વર્ષ ૨૦૧૭-૧૮થી કોમન એન્ટ્રેન્સ ટેસ્ટ તરીકે જેઇઇ મેઇનને મરજિયાત કરવાનો અને ગુજકેટ દાખલ કરવાનો પણ મહત્વપૂર્ણ નિર્ણય આજે ગુજરાત સરકાર દ્વારા લેવામાં આવ્યો હતો અને આ સંદર્ભમાં સત્તાવાર જાહેરાત કરવામાં આવી હતી. ધોરણ – ૯,૧૦,૧૧ અને ૧૨માં હાલમાં ચાલતી સેમેસ્ટર પધ્ધતિ નાબુદ કરવાનો રાજય સરકારે મહત્વપૂર્ણ નિર્ણય લીધો હોવાની જાહેરાત શિક્ષણ મંત્રી ભુપેન્દ્રસિંહ ચુડાસમાએ આજે કરી છે.

ઉચ્ચ ટેકનીકલ શિક્ષણ રાજયમંત્રી વસુબેન ત્રિવેદી અને પ્રાથમિક શિક્ષણ રાજયમંત્રી નાનુભાઈ વાનાણીની ઉપસ્થિતિમાં આજે શિક્ષણમંત્રી ભુપેન્દ્રસિંહ ચુડાસમાએ શિક્ષણ વિભાગનાં આ નિર્ણયના સંદર્ભમાં જણાવ્યું હતું કે, ધોરણ-૧૦ અને ધોરણ-૧૨ની વાર્ષિક પરીક્ષા ગુજરાત રાજય ઉચ્ચત્તર માધ્યમિક શિક્ષણ બોર્ડ લેશે. ધોરણ-૧૧ની અને ધોરણ-૧૨ પ્રથમ સેમેસ્ટરની પરીક્ષા જે તે શાળા ધ્વારા લેવાશે. વિવિધ શૈક્ષણિક સંસ્થાઓ, શૈક્ષણિક સંગઠનો, શિક્ષણ વિષયના તજજ્ઞો, વાલીઓ વગેરે ધ્વારા સેમેસ્ટર પધ્ધતિ નાબુદ કરવાની વારંવાર રજુઆતો થતી હતી. વ્યાપક પ્રમાણમાં મળેલ આ રજુઆતોના સંદર્ભમાં શિક્ષણ વિભાગે આ નિર્ણય લીધો હોવાનું શિક્ષણમંત્રીએ જણાવ્યું છે. ચુડાસમાએ જણાવ્યું હતું કે, હાલ ધોરણ-૧૧ અને ધોરણ-૧૨ મળી વિજ્ઞાન પ્રવાહમાં સી બી એસસી મુજબનો અભ્યાસક્રમ છે. પરંતુ ફીઝીક્સ અને મેથ્સમાં નહીંવત ફેરફાર છે. જ્યારે કેમેસ્ટ્રીમાં ૫ ટકા અને બાયોલોજીમાં ૨૦ ટકા ફેરફાર છે.

નીટની ૨૦૧૭માં લેવાનાર પરીક્ષામાં વિદ્યાર્થીઓને કોઈપણ જાતની મુશ્કેલી ન પડે તે ધ્યાનમાં લઈને આ અભ્યાસક્રમ તૈયાર કરીને ટૂંક સમયમાં પુરવણી પુસ્તકો વિદ્યાર્થીઓને આપવાનું શિક્ષણ મંત્રીએ જણાવ્યું છે. આ અભ્યાસક્રમ શિક્ષણ વિભાગે સી બી એસસી અને ગુજરાતના ૧૫-૧૫ તજજ્ઞો સાથે બેસીને પુરવણી તૈયાર કરાઈ છે. હાલ ચાલુ વર્ષે ધોરણ-૧૨માં જે વિદ્યાર્થીઓ પ્રવેશ્યા છે તેમને બાકી રહેલો પુરવણી અભ્યાસક્રમ આ વર્ષે જ ભણાવવામાં આવશે. જેથી નીટની ૨૦૧૭ની પરીક્ષામાં વિદ્યાર્થીઓને કોઈ મુશ્કેલી ન પડે. નીટની તૈયારી માટે બાયસેગ મારફત શાળાઓમાં તેમજ ઘેરબેઠા ટેલીવીઝન મારફત શિક્ષણ આપવાની વ્યવસ્થા કરવામાં આવશે. ધોરણ-૧૨ પછીના ઈજનેરી ફાર્મસી અભ્યાસક્રમોમાં પ્રવેશ માટે વર્ષ ૨૦૧૭-૧૮થી કોમન એન્ટ્રસ ટેસ્ટ તરીકે જેઈઈ મેઈનને મરજીયાત કરવાનો અને ગુજકેટ દાખલ કરવાનો નિર્ણય કરેલ છે.

મેડિકલમાં પ્રવેશ માટે નીટ ફરજિયાત કરવાની સુપ્રીમ કોર્ટના આદેશ બાદથી ગુજરાતના વિદ્યાર્થીઓ અને વાલીઓ અસમંજસની સ્થિતિમાં દેખાઈ રહ્યા હતા. આ વિશે અનેક કારણો પૈકીનું એક કારણ ધોરણ ૧૧-૧૨ વિજ્ઞાન પ્રવાહમાં દાખલ કરવામાં આવેલી સેમેસ્ટર સિસ્ટમ હોવાનું વાલીઓ અને નિષ્ણાતો જણાવી રહ્યા હતા. ગુજરાતના વિદ્યાર્થીઓએ ગુજકેટ માટે માત્ર બે સેમેસ્ટર ત્રણ અને ચાર એટલે કે એક વર્ષની તૈયારી કરવી પડે છે જ્યારે નીટ માટે બે વર્ષ ધોરણ ૧૧ અને ૧૨ની તૈયારી કરવી પડતી હોવાથી ગુજરાતના વિદ્યાર્થીઓ નીટમાં સારો દેખાવ કરવાની સ્થિતિ દેખાઈ રહી ન હતી. આખરે સરકારે કેટલાક મહત્વના નિર્ણય લેતા ધોરણ ૯, ૧૦, ૧૧ અને ૧૨માં સેમેસ્ટર પદ્ધતિ નાબૂદ કરવાનો આજે નિર્ણય લીધો હતો.

વિદ્યાર્થીઓને ધોરણ-૧૦થી ૧૨ એટલે કે સળંગ ૩ વર્ષ માનસિક તાણનો સામનો કરવો પડે છે. સત્ર શરૃ થયાના દિવસે જ જાહેરાત કરનાર સરકારે આ માટે પહેલીથી જ તૈયારીઓ શરૃ કરી દીધી હતી. આ માટે નવા સત્રથી નવા પુસ્તકો, તેને આધારિત કેળવણીના મોડયુલ અને પરિક્ષાના કાર્યક્રમો તૈયાર કરવા ગુજરાત ઉચ્ચત્તર માધ્યમિક શિક્ષણ બોર્ડને આદેશો આપી દેવાયા હતા. સવારે નીતિન પટેલે પત્રકારો સાથેની વાતચીતમાં આ વર્ષથી જ સેમેસ્ટર પ્રથા બંધ થવાની વાત કરી હતી. શિક્ષણ મંત્રી ભુપેન્દ્રસિંહ ચુડાસમા અને તેમની નીચેના રાજ્યકક્ષાના મંત્રીઓ પ્રો.વસુબહેન ત્રિવેદી અને નાનુ વાનાણીએ અત્યાર સુધીસ્પષ્ટતા ન કરતા વિદ્યાર્થીઓ, વાલીઓ અને શાળા સંચાલકોમાં નારાજગી જોવા મળી રહી છે.

અમદાવાદ,રાજયભરની શાળાઓમાં ઉનાળુ વેકેશન પૂર્ણ થતા આજે નવા શૈક્ષણિક સત્રની વિધીવત શરૃઆત થઇ ગઇ હતી. સવારમાં જ વિદ્યાર્થીઓ ભારે ઉત્સાહ સાથે શાળાઓમાં પહોંચ્યા હતા. મોટા ભાગના બાળકો આજે પ્રથમ દિવસે તેમના વાલીઓ સાથે શાળાઓમાં પહોંચ્યા હતા. ખાસ કરીને નાના માસુમ બાળકો તેમના માતાપિતા સાથે નજરે પડ્યા હતા. નવા શૈક્ષણિક સત્રની આજે શરૃઆત થયા બાદ આ નવા શૈક્ષણિક સત્રની પ્રક્રિયા હવે શરૃ થશે.  રાજયમાં પ્રથમ સત્રનો પ્રારંભ આજે સવારે થયો હતો અને હવે પ્રથમ સત્ર  નવેમ્બર સુધી ચાલશે.જ્યારે બોર્ડની પરીક્ષાઓ માર્ચથી શરૃ કરવાનું આયોજન હાથ ધરાયું હોવાનું જાણવા મળે છે.

પ્રાપ્ત થતી માહિતી મુજબ શૈક્ષણિક વર્ષ ૨૦૧૬-૧૭નાં પ્રથમ સત્રમાં  શૈક્ષણિક કાર્યમાં એક દિવસની સ્થાનિક રજાને બાદ કરતા શિક્ષણ કામગીરી ચાલશે. ઉનાળા વેકેશનની પૂર્ણાહૂતિ બાદ શાળાઓ ખુલી જતાં શિક્ષકો અન ેવિદ્યાર્થીઓ સમયસર પહોંચ્યા હતા. હાલમાં તીવ્ર ગરમી પડી રહી છે ત્યારે કેટલીક સ્કૂલોએ પોતાનીરીતે ટાઇમ ટેબલ નક્કી કર્યા છે. આજે પ્રથમ દિવસે મોટાભાગની શાળાઓને વહેલીતકે છોડી દેવામાં આવી હતી. છેલ્લા કેટલાક દિવસથી સૂમસામ બનેલા શાળાઓના કેમ્પસ વિદ્યાર્થીઓના શોરબકારથી ગૂંજી ઉઠ્યા હતા.   આજે આ વેકેશન પૂર્ણ થતા છેલ્લા એક મહિના કરતા વધુ સમયથી સૂમસામ બનેલા શાળાઓના કેમ્પસ વિદ્યાર્થીઓના શોરબકોરથી ગૂંજી ઉઠ્યા હતા. રાજયમાં પ્રાથમિકની ૪૦ હજાર, માધ્યમિક અને ઉચ્ચત્તર માધ્યમિકની ૧૦,૫૦૦થી વધુ શાળાઓના ૫૦ લાખથી વધુ વિદ્યાર્થીઓ આજથી નવા શૈક્ષણિક સત્રમાં જોડાયા છે.

અમદાવાદ,ગરમીના પ્રમાણમાં ફરી એકવાર તીવ્ર વધારો થયો છે. આજે રાજ્યના મોટાભાગના વિસ્તારોમાં પારો ફરી એકવાર ૪૩થી ઉપર પહોંચી ગયો હતો જ્યારે ઇડરમાં તો પારો ૪૬ ડિગ્રી નોંધાયો હતો. બીજી બાજુ અમદાવાદમાં મહત્તમ તાપમાન ૪૪.૯ ડિગ્રી રહ્યું હતું. હવામાન વિભાગ તરફથી ફરી એકવાર ઉત્તર ગુજરાત અને કચ્છના જુદા જુદા ભાગોમાં હિટવેવની ચેતવણી જારી કરવામાં આવી છે. આગામી બે દિવસ માટે હિટવેવની ચેતવણી જારી કરવામાં આવી ચુકી છે. આજે રાજ્યના જે ભાગોમાં પારો ૪૪થી ઉપર રહ્યો હતો તેમાં પાટનગર ગાંધીનગરમાં ૪૫, ડિસામાં ૪૪.૯, ઇડરમાં ૪૬, વડોદરામાં ૪૪.૧, અમરેલીમાં ૪૪.૫, સુરેન્દ્રનગરમાં ૪૬.૩, કંડલા એરપોર્ટ ખાતે ૪૪.૧નો સમાવેશ થાય છે. કાળઝાળ ગરમીના કારણે આજે રવિવારના દિવસે લોકો ત્રાસી ગયા હતા અને જનજીવન ખોરવાઈ ગયું હતું. બપોરના ગાળામાં રસ્તાઓ સુમસામ બન્યા હતા. ગરમીના પ્રમાણમાં વધારો થયા બાદ ફરી એકવાર તકેદારી રાખવા માટેની જરૃર દેખાઇ રહી છે. હાલમાં ગરમીનો પારો ૪૮ સુધી પહોંચી ગયો હતો. લુ લાગવાના અથવા તો હિટ સ્ટ્રોકના કેટલાક બનાવો બન્યા હતા. મોત પણ અમદાવાદમાં થયા હતા.

ગરમીથી બચવા માટે વધુ પાણી અને છાશનો ઉપયોગ કરવા માટેની સલાહ તંત્ર દ્વારા આપવામાં આવી છે. નિષ્ણાંત તબીબો પણ આવી જ સલાહ આપે છે. ગરમીના પ્રમાણમાં પાણીજન્ય રોગના કેસમાં વધારો થાય છે. જેમાં પેટમાં દુખાવાની ફરિયાદ રહે છે. જાણકાર લોકોના કહેવા મુજબ હજુ થોડાક દિવસ સુધી ઉંચુ તાપમાન રહી શકે  છે. લોકોને વધુ તાપનો અનુભવ થશે. તાપમાનમાં ફરી વધારો થતા લોકો સાવધાન થઇ ગયા છે.  ભારતમાં છેલ્લા બે વર્ષથી દુષ્કાળની સ્થિતિ જોવા મળી રહી હતી. આ વખતે ૯૬ ટકા મોનસુનની આગાહી કરવામાં આવી છે. મોનસુન સમાન્ય રહેશે અને પોતાની ગતિ કરતા આગળ વધશે. આઈએમડી દ્વારા સારા વરસાદની આગાહી બાદ મોનસુનની રાહ જોવામાં આવી રહી છે. ગુજરાતમાં મોનસુનને લઇને હજુ પણ અટકળોનો દોર ચાલી રહ્યો છે. અત્યાર સુધીમાં હિટસ્ટ્રોકની અસરથી ૯૪ દર્દીઓ દાખલ થયેલા છે. અમદાવાદ શહેરમાં ૮૬ અને આઠ કેસ અમદાવાદ બહારના નોંધાયા છે. અમદાવાદમાં હિટસ્ટ્રોકના કારણે ૧૬ લોકોના મોત થયા છે જે પૈકી અમદાવાદ શહેરમાં ૧૨ અને અમદાવાદ બહારના ચાર દર્દીઓનો સમાવેશ થાય છે. આવનાર દિવસોમાં વધી રહેલા તાપમાનના અનુસંધાનમાં કેટલીક સલાહ પણ આપવામાં આવી છે.