ભારતીય ક્રિકેટ કન્ટ્રોલ બોર્ડનું મહત્વનું નિવેદન

સ્ટેડિયમમાં ઓછી સંખ્યામાં પણ પ્રશંસકોની હાજરીથી જોખમ ઊભું થઈ શકે છે : બીસીસીઆઈની સ્પષ્ટ વાત
(સંપૂર્ણ સમાચાર સેવા)
નવી દિલ્હી, તા. ૧૫
ભલે કોરોના વાયરસના સંક્રમણને જોેતા હજુ એ નક્કી ન થઈ શક્યું હોય કે આગામી ટી-૨૦ વર્લ્ડ કપ નું આયોજન થશે કે નહીં, પરંતુ ભારતીય ક્રિકેટ કંટ્રોલ બોર્ડેર્ પોતાની સ્થિતિ સ્પષ્ટ કરી દીધી છે. બીસીસીઆઈએ ઓસ્ટ્રેલિયન પ્રધાનમંત્રી સ્કોટ મોરિસનના ભારત-ઓસ્ટ્રેલિયા ટેસ્ટ સિરીઝ ખાલી સ્ટેડિયમની જગ્યાએ દર્શકોની હાજરી વચ્ચે રમાવવાની આશા પર કહ્યું કે તેનો નિર્ણય ભારત સરકાર લેશે. હકીકતમાં મોરિસનના આ નિવેદન બાદ ટી-૨૦ વર્લ્ડકપનું આયોજન થવાની શક્યતા વધી ગઈ હતી. પરંતુ બીસીસીઆઈનું કહેવું છે કે, સરકારની મંજૂરી વગર ટીમ ઈન્ડિયા વર્લ્ડકપમાં ભાગ લેશે નહીં એક બીસીસીઆઈ અધિકારીએ જણાવ્યું કે, અમને ટી૨૦ વર્લ્ડકપ માટે ઓસ્ટ્રેલિયા જવા પર ખૂબ ખુશી થશે પરંતુ સ્વાસ્થ્ય વગેરે સંલગ્ન મુદ્દાને ધ્યાનમાં લઈને નિર્ણય લેવાશે તે સરકારે નક્કી કરવાનું છે. અમે સરકારના નિર્દેશોનું પાલન કરીને જ નિર્ણય લઈશું. અમારા માટે ખેલાડીઓ અને પ્રશંસકોની સુરક્ષા સૌથી વધુ મહત્વના છે. એવું નથી કે ટીમે મુંબઈથી પુણે સુધી એક વિસંક્રમિત બસમાં બેસીને જતા રહેવાનું છે. ત્યાં રમીને પાછા આવવાનું છે અને પોત પોતાના ઘરોમાં સુરક્ષિત વાતાવરણમાં પહોંચી જવાનું છે બીસીસીઆઈના અધિકારીએ કહ્યું કે, સ્ટેડિયમમાં ઓછી સંખ્યામાં પણ પ્રશંસકોની હાજરીથી જોખમ ઊભુ થઈ શકે છે. ખાસ કરીને કોરોના વાયરસના લક્ષણો વગરના કેસોને જોતા ઓછી સંખ્યામાં પણ દર્શકો સંક્રમણ ફેલાવી શકે છે. ટી-૨૦ વર્લ્ડકપનું આયોજન આ વર્ષે ઓસ્ટ્રેલિયામાં ૧૮ ઓક્ટોબરથી ૧૫ નવેમ્બર સુધી થવાનું છે. પરંતુ કોરોના મહામારીના કારણે હજુ સુધી આ આયોજન પર લટકતી તલવાર છે. ગત સપ્તાહે મળેલી એક બેઠકમાં આઈસીસી પણ વર્લ્ડકપ માટે હાલ ’થોભો અને રાહ જુઓ’ની નીતિ અપનાવવાની જાહેરાત કરી ચૂકી છે.

ટ્રાફિક શાખા તરફથી જાહેરનામુ બહાર પાડ્યુ

શાહપુર બહાર હાલમાં ગુજરાત મેટ્રો રેલ કોર્પોરેશન લી. દ્વારા મેટ્રો સ્ટેશન બનાવવાની કામગીરી ચાલુમાં છે

(સંપૂર્ણ સમાચાર સેવા)
અમદાવાદ,તા.૧૫
આગામી ૨૩ તારીખે અષાઢી બીજ હોવાથી તે દિવસે ૧૪૩મી રથયાત્રા નીકળવાની હોવાના પગલે જે રસ્તેથી રથયાત્રા નીકળવાની છે તે તમામ રસ્તાને બંધ કરવામાં આવશે, તેના પગલે બંધ કરેલા રસ્તાને ડાયવટ કરવામાં આવ્યા છે. જેમાં જમાલપુરચોકી થી ખમાસા ચોકી તરફનો રસ્તો બંધ રહેશે જેનો વૈકલ્પિક માર્ગ મ્યુનિ હેલ્થ સ્લમ ક્વાટર્સ થઈ ગાયકવાહ હવેલી માર્ગ, રાયખંડ ચાર રસ્તાથી ખમાસા ચોકી તરફનો રસ્તો બંધ રહેશે જેનો વૈકલ્પિક માર્ગ જયશંકર સુંદરી હોલ અને ઈટાલીયન બેકરી તરફ ડાયવર્ટ કરાશે, રથયાત્રા ખમાસા આવે ત્યારે ગોળલીમડા, ઢાળની પોળ , દાણીપીઠ ચાર રસ્તા ને ડાયવર્ટ કરીને રાજનાથ શાકમાર્કેટ તરફ ડાયવર્ટ કરાશે, રથયાત્રા ખાડીયા તરફ આવશે ત્યારે ટ્રાફિક રૂટને સારંગપુર તરફ ડાઈવર્ટ કરવામાં આવશે, કાલુપુર સર્કલ તરફ રથયાત્રા આવતા બ્રીજના નીચે થઈ ઈદગાહ તરફ ડાઈવર્ટ કરવામાં આવશે, દિલ્લી ચકલા તરફ રથયાત્રા આવતા તે રસ્તો બંધ કરીને રીલીફ સીનેમાં અથવા મિરઝાપુર ડાઈવર્ટ કરવામાં આવશે. રથયાત્રાનો આગળનો ભાગ શાહપુર એરિયામાં ફરીને પરત દિલ્હી ચકલા આવે ત્યારે રસ્તાથી ઘીકાંટા ચાર રસ્તા જતો ટ્રાફિક અને રીલીફ ચાર રસ્તાથી ઘાકાંટા ચાર રસ્તા તરફ જતો ટ્રાફિક બંધ કરવામા આવશે. રથયાત્રાના રૂટ ઉપરના શાહપુર હલિમની ખડકીથી શાહપુર દરવાજા બહાર સુધી હાલમાં ગુજરાત મેટ્રો રેલ કોર્પોરેશન લી. દ્વારા મેટ્રો રેલ પ્રોજેક્ટ અંતર્ગત શાહપુર મેટ્રો સ્ટેશન બનાવવાની કામગીરી ચાલુમાં છે. જેથી આ દિવસે રથયાત્રા નિહાળવા આવતા દર્શનાર્થીઓ આ જગ્યાને બદલે કાલુપુર સર્કલથી પ્રેમ દરવાજા સુધીના વિસ્તારમાં રથયાત્રાના દર્શન કરી શકશે.

રાંચીની ઘટનાની તપાસ ખુદ એસપી કરી રહ્યા છે

તિરંદાજ દિપીકા કુમારીના લગ્નની તૈયારીઓ ચાલી રહી છે ત્યારે માતા-પિતા રાંચી આવ્યા હતા અને ઘટના બની
(સંપૂર્ણ સમાચાર સેવા)
રાંચી, તા. ૧૫
૧૩ મેના રોજ બદમાશોએ આંતરરાષ્ટ્રીય તીરંદાજ દીપિકા કુમારીની માતા સાથે ચેન સ્નેચિંગની ઘટનાને અંજામ આપ્યો હતો. નવા રાંચીના એસપી નૌશાદ આલમ આ કેસની પોતે જ તપાસ કરી રહ્યા છે. તેઓ રવિવારે તેમના ઘરે ગયા હતા અને દીપિકાની માતાને ઘટના અંગે પૂછપરછ કરી હતી. આ સાથે એસપી નૌશાદ આલમે પણ ગુનેગારોની માહિતી આપનારાને દસ હજાર રૂપિયાનું ઇનામ જાહેર કર્યું છે.
તેમણે એમ પણ કહ્યું કે બાતમીદારની ઓળખ પણ ગુપ્ત રાખવામાં આવશે. મળતી માહિતી મુજબ, રતુ ચટ્ટીની રહેવાસી આંતરરાષ્ટ્રીય તીરંદાજ દીપિકા કુમારીનો શનિવારે (૧૩ જૂન, ૨૦૨૦) જન્મદિવસ હતો. તેના પિતા શિવનારાયણ પ્રજાપતિ અને માતા ગીતા દેવી તેની તૈયારી માટે રાંચી ગયા હતા. બંને બપોરે અઢી વાગ્યે રાંચીથી પરત ફરી રહ્યા હતા. તે દરમિયાન સોડા ફુવારા તિલ્ટા નજીક બાઇક પલટી મારી ગઈ હતી અને માતાના ગળામાંથી ચેન ઝૂંટવીને બદમાશ ભાગી છૂટ્યો હતો. ઘટના બાદ બંને પતિ-પત્ની પોલીસને જાણ કર્યા વગર ઘરે ગયા હતા. આંતરરાષ્ટ્રીય તીરંદાજ દીપિકા કુમારીની માતા ગિતા દેવી પાસેથી બદમાશોએ સોનાની ચેન છીનવી લીધી હતી. રાંચીના સોડા ફુવારા તિલ્તા નજીક બાઇક પલટી ખાઈ ગઈ હતી અને બાઇકની પાછળ બેઠેલા કોઈ અજાણ્યા ગુનેગાર તેમને પછાડીને તેમના ગળામાંથી સોનાની ચેન લઇને નાસી છૂટ્યો હતો. ચેઈનની કિંમત આશરે ૧.૫ લાખ રૂપિયા હોવાનું કહેવાય છે. અત્રે ઉલ્લેખનીય કે તીરદંજ દીપિકા કુમારીના લગ્ન ૩૦ જૂને થવાના છે. તેથી જ પરિવાર લગ્નની તૈયારીમાં વ્યસ્ત છે. રાંચીમાં ખુખારી ગેસ્ટ હાઉસ અગાઉથી જ લગ્ન સ્થળ તરીકે બુક કરાયો હતો, પરંતુ પોલીસ હેડક્વાર્ટરે ૧૦ જૂને તેની ફાળવણી રદ કરી દીધી હતી. દીપિકા મિત્ર અતનુ દાસ સાથે લગ્ન કરવા જઈ રહી છે. ડિસેમ્બર ૨૦૧૮ માં બંનેની સગાઈ થઈ હતી. લોકો લાંબા સમયથી આ લગ્નની રાહ જોઈ રહ્યા છે.

બજારમાં કામકાજ શરૂ થયા સમસ્યા પણ ઊભી થઈ
માલ સામાનની હેરાફેરીથી લઈને અન્ય કામ માટે પણ મજૂરો મળતા ન હોવાથી ધંધાર્થીઓની મુશ્કેલીઓ વધી
(સંપૂર્ણ સમાચાર સેવા)
અમદાવાદ,તા. ૧૫
લગભગ ૭૦ દિવસ સુધી બંધ રહેલા તમામ બજાર હવે ખુલી ગયા છે. વેપારીઓએ પોતાની પેઢીઓ શરૂ કરી નિયમિત પેઢીએ બેસવાની શરૂઆત પણ કરી દીધી છે. ત્યારે તમામ બજાર અને માર્કેટના વેપારીઓની ફરિયાદ છે કે માલ સામાન ઉપાડવા તથા ચડાવવા ઉતારવા માટે હમાલ મળતા નથી જેને કારણે ખાસ્સી પરેશાની થઇ રહી છે. લોક ડાઉનમાં બેકાર બેસી રહેલા પરપ્રાંતીય શ્રમજીવીઓ વતન ચાલ્યા જતા શ્રમિકોની અછત ઊભી થઈ છે. કોરોનાની મહામારી વચ્ચે સરકારે લોક ડાઉન જાહેર કરી દેતા આખા દેશમાં લગભગ ૭૦ દિવસ સુધી વેપાર-ધંધા ઉદ્યોગો બંધ રહ્યા હતા. આ સમયે બેકાર બેસી રહેલા શ્રમજીવીઓએ વતનની વાટ પકડી લીધી છે. જેને કારણે ગુજરાતમાંથી લાખો યુવકો પોતાના વતન પહોંચી ગયા છે. આ પરિસ્થિતિ વચ્ચે હવે ધીરે ધીરે કાપડ બજાર, અનાજ બજાર, કરીયાણા બજાર ખુલી રહ્યા છે અને રાબેતા મુજબ ચાલવા લાગ્યા છે. હવે જ્યારે અનાજ બજારમાં કોઈ વેપારી ખરીદી કરવા આવે અને અનાજની ગુણો કે કોથળા વાહનમાં ચડાવવાના હોય ત્યારે તેના માટે હમાલ મળતા નથી. આ પરિસ્થિતિમાં વેપારીઓ પરેશાન થઇ ગયા છે હવે જો કોઈ છૂટક માલ હોય તો તે પરિસ્થિતિને લઈને વધુ ભાવ માગતા હોવાની પણ વેપારીઓની ફરિયાદ છે. માત્ર અનાજ બજાર જ નહીં પરંતુ કાપડ બજાર અને કરિયાણા બજારમાં પણ આવી જ પરિસ્થિતિનું નિર્માણ થયું છે જેને કારણે હવે જો વેચનારા વેપારીને ગરજ હોય તો તે હમાલની વ્યવસ્થા કરે અને જો ખરીદનારને ગરજ હોય તો તે હમાલની વ્યવસ્થા કરે તેવી સ્થિતિનું નિર્માણ થયું છે. બીજી તરફ વેપારીઓ જણાવી રહ્યા છે કે જે શ્રમજીવીઓ પોત પોતાના વતન પહોંચી ગયા છે ત્યાં હવે ચોમાસું શરૂ થઈ જતાં તેઓ તાકીદે પરત આવે તેવી સંભાવના પણ ઓછી છે. હવે તેઓ વરસાદની સિઝનમાં ખેતીનું કામકાજ કર્યા બાદ જ દિવાળીએ પરત અમદાવાદમાં આવે તેવી સંભાવના વ્યક્ત કરાઈ રહી છે.