સ્ટાફનો એન્ટીજન ટેસ્ટ કરાશે
ચીફ જસ્ટિસ દ્વારા જાહેર કરાયેલા સર્ક્‌યુલર મુજબ ૧૬ ઓક્ટોબરથી ૧૯ ઓક્ટોબર સુધી હાઇકોર્ટ બંધ રહેશે
(સંપૂર્ણ સમાચાર સેવા)
અમદાવાદ,તા.૧૫
ગુજરાતમાં કોરોના સંક્રમણનાં કેસોને કારણે ચિંતાજનક સ્થિતિ છે. બુધવારે મળતા આંકડા પ્રમાણે, રાજ્યમાં ૧૧૭૫ દર્દીઓ નોંધાયા હતા. તો બીજી તરફ ૧૪૧૪ દર્દીઓ સાજા થઇને ઘરે પરત ફરી ચુક્યા છે. જ્યારે રાજ્યમાં આજે ૧૧ લોકોના કોરોનાથી મોત થયા છે. કોરોના મહામારીને પહોંચી વળવા માટે ગુજરાત હાઈકોર્ટમાં ફરી લોકડાઉન જાહેર કરવામાં આવ્યું છે. જેથી ગુજરાત હાઈકોર્ટની કામગીરી ૪ દિવસ એટલે ૧૬થી ૧૯ ઓક્ટોબર સુધી બંધ રાખવાનો નિર્ણય કરવામાં આવ્યો છે. ચીફ જસ્ટિસ દ્વારા જાહેર કરાયેલા સર્ક્‌યુલર મુજબ, ૧૬ ઓક્ટોબરથી ૧૯ ઓક્ટોબર સુધી હાઇકોર્ટ બંધ રહેશે. આ દિવસોમાં હાઇકોર્ટના અધિકારીઓ, રજીસ્ટ્રી સ્ટાફ સહિતના કર્મચારીઓનો એન્ટીજન ટેસ્ટ કરવામાં આવશે. અમદાવાદ મહાનગર પાલિકા દ્વારા ઉચ્ચ ન્યાયાલયના રેકોર્ડ રૂમ, વોશરૂમ, ચેમ્બર, ઓફિસ સહિત સંપૂર્ણ કેમ્પસની સાફ સફાઈ કરાશે. તમામ પ્રકારનું જ્યુડિશિયલ અને વહીવટી કામ ચાર દિવસ બંધ રહેશે. આ સિવાય એડવોકેટ જનરલ, સરકારી વકીલો વગેરેની ઓફિસ બંધ રાખવા આદેશ કરાયો છે. કોર્ટ પરિસરમાં આવેલી સરકારી ઓફિસ, સ્ટેટ બેન્ક ઓફ ઇન્ડિયા, પોસ્ટ ઓફિસ વગેરે બંધ રહેશે. આ ઓફિસો પણ સેનેટાઇઝ કરાશે. ૧૬ ઓક્ટોબરના કેસ લિસ્ટ ૨૦ ઓક્ટોબરથી લેવામાં આવશે. ૧૯, ૨૦ અને ૨૧ ઓક્ટોબરથી ફિક્સ મેટર ૨૧ ઓક્ટોમ્બરે લેવાશે. ફિઝિકલ ફાઇલીગ ૨૦ ઓક્ટોબરથી શરૂ થશે. જો કે આ દરમિયાન ઇ- ફાઇલીગ શરૂ રહેશે. તેમજ નવા કેસો ૨૦ ઓક્ટોબરથી લેવાશે. આ સાથે આદેશ જાહેર કરાયો છે કે, સર્ક્‌યુલરમાં એસીએસ હોમ અને રાજ્ય પોલીસ વડાને જાણ કરી કહેવામાં આવ્યું છે કે, હાઇકોર્ટમાં ફરજ પર રહેલા સિક્યુરિટી સ્ટાફ જે જગ્યાએ ડ્યુટી પર છે તેમણે તે જગ્યાએ જ હાજર રહેવાનું રહેશે અલગ અલગ જગ્યાએ ફરવા પર મનાઈ ફરમાવવામાં આવી છે.

અમદાવાદમાં લોકોમાં રોષ ફેલાયો
લારી પર જાવ તો માસ્ક કાઢતા નહીં નહીંતર ૨૦ના વડાપાઉં અને ૧૦ની પાણીપુરી માટે ૧૦૦૦નો દંડ ભરવો પડશે
(સંપૂર્ણ સમાચાર સેવા)
અમદાવાદ,તા.૧૫
અંગ્રેજીમાં એક કહેવત છે જેના મુજબ હોઠ અને કપ વચ્ચે ઘણી સ્લિપ હોઈ શકે છે. આ કહેવત બે અમદાવાદી આઈટી પ્રોફેશનલ્સ માટે બિલકુલ સાચી ઠરી જ્યારે તેમણે પાણીપૂરી ખાવા માટે પોતાનું માસ્ક નીચે કર્યું અને પોલીસે તેમને ૧૦૦૦નો દંડ ફટકારી દીધો. કોરોના મહામારીને લઈને પોલીસ અને કોર્પોરેશન જાહેરમાં માસ્ક ન પહેરનારાઓ પર કડક પગલા લઈ રહી છે અને ૧૦૦૦ સુધીનો દંડ કરવામાં આવે છે. આ ઘટના શહેરના આનંદનગર વિસ્તારમાં આવેલ એક જાણીતા પાણીપુરીના સ્ટોલ પાસે ઘટી છે. પોલીસ આઈટી પ્રોફેશનલ્સની એ વાતને માન્ય ન રાખી કે તેઓ પાણીપુરી ખાવા માટે માસ્ક ઉતારીને ઉભા છે. બીજા આવા જ એક કેસમાં ઘાટલોડિયામાં ફિઝિયોથેરાપિસ્ટ મહિલાને વડાપાઉન ખાવાની તેની ઈચ્છા મોંઘી પડી જ્યારે બટરમાં શેકાયેલા વડાપાઉનનો ટેસ્ટ મોઢામાં જાય તે પહેલા જ પોલીસે તેને માસ્ક ન પહેરવા માટે દંડ ફટકારી દીધો. જોકે મહિલાએ તેનો જોરદાર વિરોધ કરતા કહ્યું કે તેણે કોઈ ગુનાનો ભંગ નથી કર્યો અને ફક્ત વડાપાઉં ખાવા માટે તેણે માસ્ક નીચે કર્યું છે. જોકે પોલીસે તેની વાત ન માનતા મહિલા ફિઝિયોથેરાપિસ્ટ સામે કલમ ૧૮૮ હેઠળ ગુનો નોંધી એફઆઈઆર નોંધી છે. નારણપુરા પોલીસ દ્વારા આ દંડની કાર્યવાહીનો ભોગ બનેલી મહિલાએ પૂછ્યું કે મને વડાપાઉની પ્લેટ હજુ હાથમાં મળવાની જ હતી અને પોલીસે માસ્ક ન પહેરવા માટે દંડ કર્યો. માસ્ક પહેરીને હું કઈ રીતે ખાઈ શકું? રાજ્ય સરકાર દ્વારા અનલોકના જુદા જુદા તબક્કા હેઠળ રાજ્યમાં વેપાર ધંધા અને ઉદ્યોગને ખોલવાની મંજૂરી આપતા રાજ્યના અર્થતંત્રને પાટે ચડાવવાનો પ્રયાસ કરી રહી છે પરંતુ બીજી તરફ પોતાની ભૂખને શાંત કરવા માટે લારી કે સ્ટોલ પર જતા લોકોને માસ્ક ન પહેરવા માટે દંડવામાં આવી રહ્યા છે. જેના બચાવમાં પોલીસ કહી રહી છે કે આ એક જરુરી પગલું છે. ખાસ કરીને ટી સ્ટોર અને નાસ્તાપાણીની લારીઓ પર વધુ ભીડને જામતી રોકવા અને મહામારીને ફેલાતી રોકવા માટે લોકોમાં કોરોના હાઈજીન પ્રત્યે જાગૃતિ ફેલાવવા માટે કડક નિયમની અમલવારી જરુરી છે.

કાકાને પોલીસે ઝડપી પાડ્યો
માનસિક અસ્વસ્થ ભત્રીજી પર તેના જ કૌટુંબિક કાકાએ ખેતરમાં કામના બહાને લઈ જઈ અનેક વખત દુષ્કર્મ આચર્યું
(સંપૂર્ણ સમાચાર સેવા)
છોટાઉદેપુર,તા.૧૫
જિલ્લાના કવાંટ તાલુકાનાં એક ગામમાં ચોંકાવનારો કિસ્સો સામે આવ્યો છે. માનસિક અસ્વસ્થ ભત્રીજી પર તેના જ કૌટુંબિક કાકાએ ખેતરમાં કામના બહાને લઈ જઈ તેની સાથે અનેક વખત દુષ્કર્મ આચર્યું છે. જેથી માનસિક અસ્વસ્થ ભત્રીજીએ નવજાતને જન્મ આપતા સમગ્ર મામલો બહાર આવ્યો છે. પીડિતાના પિતાએ આ અંગે પોલીસમાં ફરિયાદ નોંધાવતા સ્થાનિક પોલીસે કાકાને થોડા જ કલાકોમાં ઝડપી પાડ્યા હતા. આ મામલે મળતી માહિતી પ્રમાણે, છોટાઉદેપુર જિલ્લાના કવાંટ તાલુકાનાં એક ગામમાં માનસિક અસ્વસ્થ યુવતી તેના પરિવાર સાથે જ રહેતી હતી. ૨૭ વર્ષીય આ યુવતી ભલે માનસિક અસ્વસ્થ હતી પરંતુ તેને કોઈપણ કામ કહો તે હોંશે હોંશે કરી આપતી અને તેના આ સ્વભાવને કારણે કુટુંબ અને ફળીયાના લોકો તેને કંઇકને કંઇક કામ સોંપતા. તેના આ સ્વભાવને લઈ તેના પિતાના ફોઈના દીકરા પ્રવીણ રાઠવા એટલે કે યુવતીના કૌટુંબિક કાકા તેને અવાર નવાર ખેતરમાં કામ માટે લઇ જતા હતા. પરિવારને એમ કે કાકા છે, કામ માટે બોલાવી જાય છે ખેતરમાં કામ કરતાં કરતાં કાકા પ્રવીણની દાનત આ માનસિક અસ્વસ્થ ભત્રીજી ઉપર બગડી અને તેણે ભત્રીજીની મંદ બુદ્ધિનો લાભ લઈ તેની સાથે દુષ્કર્મ આચર્યું. પરંતુ પીડિતા મંદ બુદ્ધિની હોવાને લઈ તેણે આ બાબતે કોઈને કંઇ કહ્યું નહીં. ત્યારબાદ આ હવસખોર કાકાની હિંમત વધી ગઇ. હવસખોર આધેડ કાકાને એમ હતું કે તેની આ કરતૂતની ક્યારેય કોઈને ખબર નહીં પડે. જેથી તે અવાર નવાર તેને પોતાના ખેતરે લઈ જતો અને પોતાની હવસનો શિકાર બનાવતો. પરંતુ કહેવાય છે ને કે પાપ એક દિવસ છાપરે ચડીને પોકારે છે. દુષ્કર્મ આચર્યા બાદ માનસિક અસ્વસ્થ આ યુવતીનું પેટ વધવા લાગ્યું ત્યારે તેના માતા પિતાએ તેની આરોગ્ય તપાસ કરાવતા તે સગર્ભા હોવાની જાણ થતાં માતા-પિતાના પગ નીચેથી જમીન સરકી ગઈ પોતાની માનસિક અસ્વસ્થ દીકરી સાથે કોણે આ કુકર્મ કર્યું હશે તેની ચિંતા તેમણે થવા લાગી. માનસિક અસ્વસ્થ દીકરીને આ વિષે તેઓ પૂછે તો કઈ રીતે પૂછે તે એમના માટે મોટો પડકાર હતો. આખરે પીડિતાની માતાએ તેને તેની સૂઝબૂઝથી પીડિતા પાસેથી આ વિષે પૂછપરછ કરી હતી. પોતાના જ ફળિયામાં રહેતો અને પીડિતાના ફોઈનો દીકરો પ્રવીણ રાઠવા જ તેનો ગુનેગાર હોવાનું સામે આવ્યું. આ દરમિયાન પીડિતાએ એક નવજાતને જન્મ આપ્યો તો પોતાની દીકરીને ન્યાય પણ અપાવવો જરૂરી છે. તેમ વિચારી પીડિતાના પિતાએ નવજાતના જન્મના બે દિવસ બાદ કવાંટ પોલીસમાં પોતાના કૌટુંબિક ભાઈ પ્રવીણ રાઠવા સામે ફરિયાદ નોધાવી હતી. ફરિયાદ થતાં પોલીસે ગણતરીના કલાકોમાજ નરાધમ પ્રવીણ રાઠવાને ઝડપી પાડ્યો છે. તો બીજી તરફ પોલીસે આ જઘન્ય દુષ્કર્મના આરોપીનો કોરોના ટેસ્ટ કરાવવાની સાથે તેનું મેડિકલ અને સાથે નવજાત ના ડીએનએ ની તપાસ કરાવી આરોપીના ગુનાના પુરાવા એકત્રિત કરવાની તજવીજ હાથ ધરી છે.

અમદાવાદમાં લુખ્ખાઓ બેફામ બન્યા
પ્રકાશ પટેલ હૉસ્પિટલ ખાતે હાજર હતા તે દરમિયાન મોબાઈલ ઉપર કરણ રબારી નામની વ્યક્તિએ ફોન કર્યો
(સંપૂર્ણ સમાચાર સેવા)
અમદાવાદ,તા.૧૪
અમદાવાદ શહેરમાં લુખ્ખાઓએ જાણે કે હવે હદ જ વટાવી દીધી હોય તેમ લાગી રહ્યું છે. ચોરી, લૂંટ બાદ હવે ખંડણીના એક પછી એક બનાવો સામે આવી રહ્યાં છે. શહેરના ઘાટલોડિયા વિસ્તારમાં હૉસ્પિટલ ધરાવતા ડૉકટર પાસે રૂપિયા ૧૦ લાખની ખંડણી માંગવામાં આવી છે. ડૉક્ટર તરફથી આ મામલે ફરિયાદ દાખલ કરાવવામાં આવી છે. ડૉક્ટરની ફરિયાદ પ્રમાણે આરોપી કોણ છે અને શું કરે છે તેના વિશે તેમને કોઈ માહિતી નથી. આ ઉપરાંત આરોપી સાથે તેમણે ભૂતકાળમાં પૈસાની કોઈ લેદીદેતી પણ કરી નથી. ઘાટલોડિયા વિસ્તારમાં હૉસ્પિટલ ધરાવતા પ્રકાશ પટેલ ગઇકાલે બપોરે તેમની હૉસ્પિટલ ખાતે હાજર હતા તે દરમિયાન તેમનાં મોબાઈલ પર કરણ રબારી નામથી એક વ્યક્તિએ ફોન કર્યો હતો. ફોન કરનાર શખ્સે જણાવ્યું હતું કે, તે લોકોની બહુ પત્તર ફાડી છે. તું મને ૧૦ લાખ રૂપિયા આપી દે. જોકે, ડૉકટરે ડર્યા વગર ફોન કરનાર વ્યક્તિે કહ્યું હતું કે, તારા જેવા મેં કેટલાય જોયા છે. હું પોલીસ ફરિયાદ કરીશ. ડૉક્ટરની આવી વાત બાદ આરોપી ઉશ્કેરાઈ ગયો હતો અને બીભત્સ ગાળો બોલી ધમકી આપી હતી કે, તું મને ૧૦ લાખ નહીં આપે તો હું જોઉં છું તારી હૉસ્પિટલ કેવી રીતે ચાલે છે. બાદમાં તેણે ફોન કાપી નાખ્યો હતો. આ મામલે ડૉક્ટરે તેનાં કમ્પાઉન્ડરને જાણ કરી હતી અને બાદમાં પોલીસ ફરિયાદ દાખલ કરાવી હતી. ડૉક્ટરના કહેવા પ્રમાણે આ કરણ રબારી કોણ છે, ક્યાં રહે છે, શું કરે છે તેની તેમને કોઈ જાણ નથી. ઉપરાંત તેની સાથે પૈસાની કોઈ લેતીદેતી કરી હોવાનો ઇન્કાર કર્યો છે. હાલ પોલીસે આ સમગ્ર મામલે ફરિયાદ નોંધીને વધુ તપાસ શરૂ કરી છે. ઉલ્લેખનીય છે કે અગાઉ પણ શહેરમાં ખંડણી માંગવાના બે ગુના દાખલ થઈ ચૂક્યા છે. જેમાં વટવામાં એક વેપારી પાસે રૂપિયા ૫૦ લાખની ખંડણી તેમજ ઓઢવમાં પણ વેપારી પાસે ખંડણી માંગવામાં આવી હતી.