પાલતુ લેબ્રાડોર ઘરેલુ હિંસાનો ભોગ બન્યો

આનંદનગર વિસ્તારનો બનાવ
(સંપૂર્ણ સમાચાર સેવા)
અમદાવાદ,તા.૨૪
કોરોના અને લોકડાઉનના કપરા સમયગાળામાં લોકોની માનસિક સ્થિતી વિકૃત થઈ ગઈ છે, લોકો પોતાનું માનસિક સંતુલન નાની-નાની વાતોમાં ગુમાવતા થયા છે. ત્યારે આવો જ એક કિસ્સો સેટેલાઈટનાં આનંદનગર રોડ ઉપર આવેલાં હેત્વી ટાવર પાસે આવેલી નિર્મલ પાર્ક સોસાયટીમાં બન્યો છે. આ સોસાયટીમાં રહેતાં પિયુષ નાહરે ગુસ્સામાં આવીને માત્ર ૪૫ દિવસનાં જ પોતાના પાલતુ શ્વાન (લેબ્રાડોર)ને મોતને ઘાટ ઉતારી દીધુ હતુ. ઘરમાં પાલતું શ્વાન આવ્યા બાદ નાની નાની વાતમાં ઝઘડાની વચ્ચે શ્વાનનાં માલિકે ગલુડિયાને ગુસ્સામાં ભીંત સામે ૨-૩ વાર ફેંક્યુ હતુ અને આખરે ઘર ની બહાર માસુમ ને ફેંકી દીધું હતું, જેમાં શ્વાન ગંભીર રીતે ઈજાગ્રસ્ત થયુ હતુ, ત્યારે શ્વાન પ્રેમી અને પાંજરાપોળ જીવદયા ચેરીટેબલ ટ્રસ્ટમાં માનદ સેવા આપતા દેવેષ ત્રિવેદીને સમગ્ર કિસ્સાની જાણ થતાં તેમણે ગલુડિયાની સારવાર કરી હતી. જેમાં ગંભીર રીતે ઘાયલ થયેલાં ગલુડિયાનું સારવાર દરમ્યાન મોત થયુ હતુ. ત્યારે દેવેષભાઈ ત્રિવેદીએ આવા વિકૃત માનસ ધરાવતા પિયુષ નાહર સામે આનંદ નગર પોલીસ સ્ટેશન માં એફઆઈઆર દાખલ કરી હતી.